“O se mea ina lelei o uso ae nonofo faatasi, o lupe foi sa va o eseese a ua fuifui i le fusi afu e tasi”
O le auga lea ma le faamoemoe a le Aiga Sa Mulitalo i Saanapu i le Aso Toonai ua mavae 20 o Setema i le hall a Cook Island i Magele. O le faataunuuina o le latou uluai mafutaga i tamafanau uma na tupuga mai i totonu o lenei aiga. E valu faletama na auai, ma sa vaaia le fiafia o tina ma tamā aemaise o fanau i lenei faatasiga ona o le uluai tuufaatasiga muamua lenei ua mafai ona auai le toatele o le aiga. Na muamua lava i le lotu faafetai na taitaia e le susuga i le faafeagaiga ia Aliimuamua Poasa Auvele mai le Ekalesia Faapotopotoga a le Atua i Mount Wellington, ona sosoo ai lea ma le fofogaina o le afioga a le Atua e le susuga i le faafeagaiga ia Tilaulelei Mulitalo.
O le faamanatu a le auauna a le Atua i lona aiga, o le Atua o le amataga o mea uma, auā o le mafutaga a le Aiga Sa Mulitalo, o le uluai faatasiga lea ua potopoto uma ai le toatele. Na saunia foi le tatalo leoleoa e manatua ai mātua na latou uluai asaina le gasū o le taeao i totonu o le aiga mai le tele o tausaga.
O le fofoga o le aso o le susuga ia Lelevaga Apelu ma o ia foi sa faafeiloaia le paia o le latou aiga na auai. Na auauai faletama taitasi i luga e molimau ma faalauiloa le latou tupuaga ua mafua ai lenei mafutaga.
E taga mālie eseese lava le faalogologo auā ua toe fafagu ma faamanatu mai e nisi o tina matutua i totonu o le aiga ni mea sa tutupu i aso ua mavae i o latou mātua ma mea sa latou vaai i ai a o laiti.
O le toatele o lenei auaiga na mautinoa ai o nisi o i latou o loo tele ina aumau i le motu i Salafai. Ma o le manulauti lea o lenei mafutaga o le faamasani ma mafuta faatasi ina ia iloa e le isi le tasi. O le tele foi o molimau na iai, e oo lava i tagata matutua o le taimi muamua lea ua feiloai ai ma nisi o le aiga.
O mātua na latou faavaeina lenei aiga, o ni mātua sa galulue faafaifeau ma o loo tauaveina mai pea e nisi o alo ma fanau o loo soifua mai i le taimi nei lenei vaalauina mai le Atua. Sa faatinoina nisi o aitema e le fanau ma sa tatala foi le avanoa i soo se tasi e fia fai sana aitema, ma faaiu ai i le taumafataga na saunia ma tapenaina e le mafutaga Sa Mulitalo i Saanapu.
O le susuga ia Aliimuamua Pesi Faaaoga o loo avea nei ma peresetene, o le failautusi o loo tauaveina e le faletua ia Poliaga Samuelu ma le teutupe o loo seei mai ai le susuga ia Lelevaga Apelu ma le faamoemoe o le vaiaso lona tolu o Tesema o le a toe maua ai le isi faatasiga.
