Ua lē utufia le loimata maligi o aiga, uo ma le lalolagi atoa, talu mai le tau faaiuga o le vaiaso ua tea nei, na salalau ai le tala faanoanoa i le malaga a le vaalele o le kamupani vaalele a le atunuu o Meleisia, le Malaysia Airlines Flight MH17.
Na aga mai lenei faigamalaga mai le aai o Amsterdam, i le itu matū-i-sisifo o le atu Europa ma le faamoemoe ina ia tulaueleele i le malaevaalele i Kuala Lumpur, le laumua o Meleisia.
O se nofoaga e latalata i le tuaoi o Rusia ma le atunuu o Ukaraine (Ukraine) ua ta‘ua e nisi o faamatalaga ua momoli mai, na fana sese ai e le ‘au faatupu faalavelave, o loo lagolagoina e le atunuu o Rusia – lenei vaalele, pa ma mu salalau ai. O fe‘aina‘iga ile va o le Malo o Ukaraine faapea le au faatupu faalavelave ua ta‘ua mai, o loo tuua‘ia i lenei faalavelave matautia. E silia ma le 290 le aofai o le pasese, e aofia ai ma le auvaa e toa sefululima, o loo lipotia mai na malaga atu ma fetaia‘i ma lo latou iuga faamomoiloto, ina ua momoe lava ma manū e lē fati, ae sau mala e atia‘i.
E oo mai i le taimi nei, o loo fai pea mumuga fālō a malo o Ukaraine ma Rusia, poo ai tonu lava e tatau ona pa‘ū i ai le ulu o le samala, i tuua‘iga e faatatau i lenei faalavelave, aemaise o soifua ua maimau ma le loto faavauvau ua pupuna a‘e i le toatele o aiga o ē ua aafia.
O faamaumauga ua tuuina mai ua faamaonia ai e toalua tagatānuu o Niu Sila, le alii o Robert Ayley e alala i le aai o Otaki i Ueligitone ae na soifua a‘e i Peretania, faapea le tina ia Mary Menke, na soifua i Niu Sila ae o loo aumau i Ausetalia i le taimi nei.
Na malaga mai le tina ia Mary ma lona aiga, faapea le alii o Robert, faatasi ai ma nisi alii Peretania se toalua – ma le fuafuaga ina ia faaauau mai i Ausetalia ma Niu Sila le faigamalaga pe a mae‘a ona afea Kuala Lumpur.
E to‘a 27 tagatānuu Ausetalia, 9 tagatānuu Peretania ma le toatele o isi mai Meleisia ma le atu Europa, na maliliu uma ai I lenei faigamalaga. Pe ā ma le 11 atunuu o loo iai o latou tagatānuu ua aafia i lenei faalavelave matautia.
Ua faaalia foi i faamatalaga auina mai le nofo popole o tagata ona e foliga mai ua lē o toe saogalemu femalagaiga i le ea i totonu o nei atunuu, aemaise ai o lenei vaitaimi i le tele o fonotaga ma mafutaga o loo fuafuaina, ma ua amata ona oo mai lagona fefe ma le lē toe fia malaga ona o nei faalavelave tutupu.
Aemaise foi, e tupu lenei tulaga, ae o loo malaulau pea i lagona mafatia o tagata le faalavelave na tupu i le masina o Mati, i se tasi foi o faigamalaga a le fuavaalele lava lenei a Meleisia, i lana faigamalaga MH370 lea na mou faafuasei ua lē o iloa pe o le iuga foi lava lea na latou fetaia‘i.
O le isi tulaga ua atili ai ona nofo lē mautonu tagata, ona o le pusa uliuli (black box) o le malaga lenei MH17, le pusa o loo iai faamaumauga faakomepiuta e faaaogā e pailate vaalele ma vateatea ua iai le tomai e mafai ai ona suesueina ma faamaonia ala o faigamalaga a se vaalele – ua ta‘ua mai e lei maua lenei pusa, o loo tau sailia pea.
Ua iai foi nisi o faamatalaga ua tuuina mai e faapea, o loo ua maua le pusa uliuli o le malaga lea, ae o loo feeuna‘i foi malo o Rusia ma Ukaraine poo ai o loo nanāina, aemaise ua tele nisi o faamaumauga ua ta‘ua ai e tele ni tulaga e faamaonia le tele o fesili o loo fia malamalama ai tagata o loo faia suesuega o lenei faalavelave – e mafai ona matala mai, i le taimi e susueina ai faamaumauga o loo i totonu o le pusa uliuli lea.
