Ma‘ema‘eā le Toa Samoa i Hawaii

Toa Samoa 22 – 4 Ma‘atonga

Ua mae‘a nei le taaloga faitaulia i le va o le aulakapi Liki a Samoa le Toa Samoa ma le aulakapi liki mai Tonga le Ma‘atonga. O se taaloga na filifili atu ai le ‘au a Samoa mai i Samoa nei ae ua faafetaia e le Asosi o le Lakapi Liki taumafaiga a alo o le atunuu ina ua manumalo i le ‘au a Tonga i ‘ai e 22 i le 4.

O le malaetaalo i Honolulu i Hawaii na faatautaia ai lea fetauiga ua tele masina o faalauiloa i lea atunuu. O se vaega o le faagasologa o taaloga ua agai Samoa e tausinio ai a o sauni ai foi i le Ipu o le Lalolagi i le agai i luma a le ‘au a le atunuu.

E lei iai se avanoa na tuu e le Toa Samoa i le ‘au mai Tonga i le vave ma le malosi o lana osofai. Sa faamalosia foi taumafaiga a le ‘au a le atunuu i le auai atu o le mamalu o Samoa o loo nonofo ai i Hawaii.

O le alii ia Willie Pierce na avea ma tama taalo o le taaloga ma e lua ana sikoa mo le Toa Samoa. Sa sikoa foi lea alii ia Ajay Tuimavave.

Talu ona toe faaolaola lenei taaloga i Samoa ua matauina le tele o polokalame ua lē gata ina unai ai le taaloga mai i le fanau aoga ae o taamilosaga a ‘au a teine ma alii i kolisi maualuluga lea ua vaaia le malosi o le tulai mai i totonu o Samoa.

O le tausinioga foi i taaloga o le Pasefika (Pacific Games) lea na manumalo ai le ‘au a Samoa na fili mo le lakapi liki i le pine siliva. O le sailiga o le siamupini i ia taaloga i Papua Niu Kini na fetaui ai le ‘au a Samoa ma le ‘au numera tasi i motu o le Pasefika le ‘au lea a Papua Niu Kini ma na manumalo le ‘au a Papua Niu Kini ae ua laasia ai e Samoa le isi tulaga maualuga lea na malolo ai ‘au e pei o Fiti ma le Atu Solomona i le sailiga o pine o taaloga o le Pasefika.

E ese le aufili lea na agai atu i Hawaii ma o le faamoemoe ina ia toatele fanau a le atunuu e maua lenei taleni aemaise i lea lakapi o le liki auā le agai i luma o le taaloga i Samoa lava ia. O le fiafiaga o le Asosi Lakapi Liki ona o le toatele lava o fanau na taaalo mo le Toa Samoa i aufili eseese ia e lua, o alo lava o le atunuu o loo atinae le taaloga i totonu o afioaga ma kalapu i Samoa.