Ua faamauina le fiafia o le Matagaluega o Aoga Taaloga ma Aganuu i le mae‘a ai o le uluai vaiaso ua atofa i Samoa nei e ave ai le faatāua i le faitau tusi ma le tusitusi a fanau aoga. O se taumafaiga na agai ai le Matagaluega ma le Faletusi o le SSAB ina ia faafeiloai fanau i nisi o taitai o le atunuu na faaavanoa o latou taimi e faitau ai i le fanau.
O se taumafaiga ua faia ona o le popolega o le Matagaluega i le faaletonu o le faitau tusi ua matauina i fanau aoga a le atunuu. O lea la ua faamalosia le faitau tusi i aso uma o le aoga a fanau o aoga laiti ma aoga tulagalua ae o le vaiaso atoa na tea nei na faaulutala o taitai o tagata faitau.
O le alii Palemia lea na faapea ona ia tatala aloaia le vaiaso ma unai fanau ina ia toaga e faitau tusi. O lana mau o le faitau tusi e lē o se faiga e ala ona uia e tamaiti uma ona o le vaega o aoaoga ae o se faiga e tatau ona mautinoa le faia auā e aogā i le ola tuputupu a‘e o soo se tagata soifua.
O le tele o faauluuluga o Matagaluega ma Faalapotopotoga o le Malo na tofia faatasi ma tusitala ina ia mafai ona faitau i le fanau ma e oo i le pule o le ANZ o le alii palagi o iai nei na agai lava i Falelatai i le aoga laititi i Siufaga e faatino le galuega lea i le vaiaso na tea nei. Sa faatino foi galuega faalauiloa a faletusi eseese i le atunuu ma le mafuaaga ina ia mafai ona unai le tomai i le fanau ma faamalosi i faiaoga ma mātua auala e fiafia ai fanau e faitau tusi.
E faigata le tau faatosina o fanau, o se finagalo lea o Tupa’imatuna Iulai Lavea, ona o le tulaga lea ua tele televise o taaloga ma le internet i fanau i le talafatai o le taulaga ma o le mafuaaga lea ua toaitiiti lava le fanau e fiafia i le faitau tusi se‘i vaganā ai le taimi o aoga.
O le faamalosi la lea o le taumafai ina ia maua le fiafia o le fanau e agai i tusi faitau e saili ma faitau ai.
Faaalia e le Matagaluega le aogā o le faalauiloa o le vaiaso atoa na tea nei i le taumafaiga e unai le faitau tusi ma na vaaia foi le tele o le lagolago a le atunuu.
O le taualuga o lenei taumafaiga na faia ai se sailigatupe o se tagapolo e ta‘ua o le Hole in One. O le faailoga muamua o se taavale pikiapu atoa ai ma se TV 50 inisi e lei iai se isi na manumalo ai ae $20,000 le tupe na maua o lea sailiga seleni.
O lea foi la ua iai le faamoemoe ina ia mafai ona faaauau lenei taumafaiga i tausaga uma i le faagasolo ai o taumafaiga e toe agai i luga le faitau tusi a le fanau. O le tupe na aoina i le vaiaso o le faalauiloa o le a ave i faalapotopotoga e pei o le Toomaga mo ē Puapuagatia, le Koluse Mumu, Mapuifagalele ma isi.
