Mae‘a taamilosaga Kirikiti alii ma tamaitai – Sports Pasefika 2015

Ua taualugaina taaloga kirikiti ma tapenaga a le Sports Pasefika i taaloga sa faagasolo i Riversdale Reserve i Avondale i le itupa a alii faapea foi ma tamaita.
E tusa ai ma le feiloaiga ma Satele Tupe Taisalika, na ia ta‘ua ai na mafua ona faavaeina lenei faalapotopotoga ina ua maitauina i aso ua mavae, e mātele lava ina agai ‘au mai Aukilani i Sisifo nei e tauva i taamilosaga i le itu i Saute.

Sa lē faigofie le tau amataina o lea faalapotopotoga ae o loo faasolosolo ina siisii mālie lava mai lea tausaga i lea tausaga. I lenei tausaga na fuafuaina ai le Challengers Cup ma le Pasefika Shield, ua toe faataatia i tua le isi taamilosaga sa fuafuaina mo le aso malolo i le Aso Faraile nei, ona o le fia auai ai o nisi o Au mo isi taamilosaga a le PIMKA poo le Teuila, faatasi ai ma le “Mau a pule ma Tumua”.

I le taamilosaga la a le Pasefika Shield sa tauva ai Au e lima i le itupa a alii ae fā ‘au sa tauva i le taamilosaga a Tamaitai. Na matuā faatumulia le paka i Riversdale Reserve i le toatele o tagata sa maimoaina lea faamoemoe i tamā ma tina matutua e oo lava i le tupulaga talavou ma fanau laiti.
Na matagofie le faagasologa o nei taaloga e oo lava foi i le tapuaiga a ‘au uma sa auai i le pulea lelei. O le taualugaina la o nei taaloga o se vaaiga lenei i le faaiuga o le taamilosaga:

Pasefika Shield (Men)
1 Spartons
2 Knights
3 Dale State
4 Riversdale Uso
5 Living Water Youth

Pasefika Shield (Women)
1 Black Widows
2 Glen Innes Catholic Youth
3 Riverdale Uso
4 Dale State

O isi nei faailoga na tauaaoina ina ua taualugaina lea taamilosaga:

Olo silia a alii – Steven (Knights)
Olo silia a tamaitai – Rita (Riversdale Uso)
‘Ai silia a alii – Leilua Winston Timaloa
(Spartons)
‘Ai silia a tamaitai – Susanna (Black Widows)
Player of the tournament a alii – Patrick
(Dale State)
Player of the tournament a tamaitai – Susanna (Black Widows)
Na ta‘ape fiafia lea afiafi ma le loto faafiafiaina i le tapuaiga a ‘au sa tausinio ai i lea taamilosaga.
Aukirikiti a alii ma tamaitai o le Dale State

Aukirikiti a alii ma tamaitai o le Dale State