O le Aso Toonai na se‘i tuanai atu nei, na faamae‘aina ai taaloga a le taamilosaga lakapi a le Samoa United.
Sa vaaia le tinou pea o Au o le taamilosaga i le toe aso o taaloga, ae lē gata i lea o le lagolago foi a sui o afioaga i le tapuaiga o nei taaloga.
O se aso loulouā i le malolosi o matagi ma timuga ae sa lē taofia ai le faataunuuina pea o le taamilosaga i lea aso.
I le toe taaloga sa taalo ai le ‘au a Nofoalii Salevao faapea ai foi ma Samatau o nisi o ‘au lelei o lea taamilosaga. O se taaloga mataina i le finau o au uma e lua, ma sa faamae‘aina le taaloga ina ua manumalo Nofoalii Salevao ia Samatau.
Na saunoa le Peresitene o le Samoa United Union, e faafetaia ‘au uma o le taamilosaga aemaise le siitia o le tulaga sa faatinoina ai le taamilosaga 2012. Ua sauni atu nei la le Samoa United mo le latou tufatufaga faailoga i se taimi lata mai ma faamae‘a ai taaloga o le 2012.
