O le faatinoina o le fono faaletausaga a le Fono Faufautua mo Tagata Samoa i Vitoria i le Aso Toonai talu ai, aso 13 na na faamae‘a ai galuega fai o lenei tausaga, ma sasaa ai le fafao e saili se laulau fou o le a faauluulu i ai tiute ma faiva tautua o le Fono mo le tausaga fou.
O le mataupu mulimuli na pasiaina a o lei faia le palota, o le autasi lea o finagalo o le Fono o le a amata i le paeaiga lea ua tofia nei ona galulue mo le tolu tausaga ma toe sui tofi, ua suia ai le tasi le tausaga ma sui tofi sa folau mai ai le Fono i tausaga ua mavae.
O le susuga i le faafeagaiga ia Faamata‘u Leota o le Ekalesia Soofaatasi (Uniting Church) na faafoeina le faigapalota mo le suiga tofi, faatasi ma le lagolagosua a le ofisa o le Samoa Times i Melepone, ua mae‘a suaga o le vaa tele ma autasi finagalo o le mamalu lasilasi o Samoa i Melepone i ona tupu ma tamalii, auauna totofi a le Atua ma Samoa na potopoto, o le afioga ia Lemalu Faatau Nofoituala ua toe tofia i le Taitaifono, o le fetalaiga ia Taugaileula Luafalealo ua avea ma Sui Taitaifono, o le Aao Tusitusi ua toe papale ai le afioga ia Fuaialii Anthony Sofe, ma le Teuoloa ua valaauina ai le susuga ia Tapa Tailiki.
Na mae‘a le faiga filifiliga a le Fono, ona tulai lea o Sui vaaia o le Atua ma faapaia tofi fou ma faamanuia atu i ai i se sauniga puupuu. Sa saunoa faafetai le Taitaifono le afioga ia Lemalu mo le silasila a le atunuu ma lana faiga filifiliga, ona tali lea o le faaaloalo i le malu afiafi na maau i ai le Fono, ma ta‘ape ai le fuamanusina ma le viiga o le Atua. Ia manuia faiva alofilima ma tiute tauave o le Laulau fou ma le Fono atoa a tagata Samoa, o outou māmā na!
