O soo se Samoa i tulimanu e fia o le lalolagi, o loo nofo faatalitali pea ma tuufesili poo afea o le a maimoa ai i le sosooga o le ata tifaga Samoa lauiloa o le Matai, i lona Vaega 9, peitai, o lea ua faailoa mai e le pulega a le South Sea’s Pictures o le Aso Faraile aso 22 o Iuni o le a sau ai i tua le Vaega 9.

I se feiloaiga ma le Faatonu o le Matai le tofa ia Tanupo Fiu Fogalevai Aukuso na ia ta’ua ai, e lei faigofie le tuufaatasiga o le Vaega 9 o le Matai, ona o le taimi avanoa o le cast poo latou o loo faatinoina le ata, faapea foi avanoa o nofoaga o loo pueina ai le ata tifaga, e ui lava i lea, e faafetaia le Atua, ua mafai ai ona tini lau o le faamoemoe.

Na ia ta’ua foi o le taimi muamua lenei ua see atu ai le pueina o le Matai i le atunuu tele o Ausetalia, e pei ona iai nisi o vaega o le Matai o loo pueina i totonu o Brisbane. “E mai lava i le amataga o Niu Sila lava ma Samoa sa pue ai le Matai, ae o le taimi muamua lenei ua pueina ai ni vaega o le ata tifaga i totonu o Ausetalia, o le a sui ai foi le maimoa a le atunuu mai vaaiga masani o Niu Sila ma Samoa,” o le saunoaga lea a le tofa ia Tanupo Fiu Fogalevai Aukuso.

Ina ua fesiligia poo a ni vaaiga o le a maimoa iai le atunuu i le Vaega 9 o le Matai, na ta’ua e le Faatonu, “E mautinoa lava o loo faatalitali le toatele poo ai le tagata lea na ia pikia Oketi i le po lea na sola ese mai ai i lona aiga, ae o fea foi na ave iai Oketi e lea tagata.

\ E le gata i lea, o le alii Aoao o Ulisese lea ua fiu lona aiga e sue ua leiloa poo fea ua alu iai. O le Vaega 9 o loo agai lea e tali fesili ia, e le gata i lea o le tulaga fefinaua’i ua amata ona aliali mai i le afioaga o Pu’e, ina ua maua tala o le a toe faafoi atu e Safuiane le suafa Vaitilofia e aliita’i ai Pu’e.” Peitai, na manino lava le finagalo o le Faatonu, o le a maua lava le atoatoa pe a sau i tua le ata.

O le toatele o le mamalu o le atunuu, e le o mananao e vave faauma le Matai, e pei ona saunoa iai le Susuga ia Malaetele Finao o Onehunga.

“E manaia  lava pe a oo atu le Matai i le tulaga lea e iai ata Filipino e lata i le 100 vaega.” Peitai na ta’ua e le Faatonu, o lona faamoemoe sa iai e tatau ona faamae’a le Matai i le Vaega 10, pe afai e oo atu iai ua mae’a le tala, peitai, o lea ua mae’a le Vaega 9, e foliga mai foi e uma foi le Vaega 10 e le mae’a lava le tala.

O lona uiga e mafai ona sili atu i le 10 vaega o le Matai. “E tele isi ata o loo fia pue, ae o loo taotaomia nei ata fou ona o le Matai, ae e leai foi se faamoemoe ia te au e faatopelau le pueina o le Matai ma faaselemutu, ae lei mae’a le tala, ona oute manatu tele i le faamalieina o le maimoa a le atunuu,” o le finagalo faaalia lea o le tofa ia Tanupo.

Na faailoa foi e le susuga i le Faatonu, o le Aso Faraile 22 o Iuni ua faamoemoe e amata faatau ai le Matai i totonu o Niu Sila nei, o Ausetalia faatoa mafai ona maua le ata i Ausetalia i le Aso Gafua poo le Aso Lua o le vaiaso e sosoo ai, e faapea foi i totonu o Amerika ma Samoa.

Na ta’ua foi e le tofa ia Tanupo, e toatele le mamalu o le atunuu e mamao ese o latou fale mai faleoloa o loo faatauina ai le ata, peitai, e mafai ona oka sa’o mai lau DVD Online, pe a asiasi ane i le https://www.samoanmovies.bigcartel.com, e le gata i lea e mafai foi ona e maimoaina le Matai i luga o lau laptop poo lau telefoni feavea’i pe a e asiasi ane i le Online Viewing https://www.samoavisual.nichvid.com. Poo fea lava o le lalolagi o loo e aumau ai e mafai lava ona e maimoina le Matai 9 pe a e asiasi ane i le Online Viewing.