Mae’a ona lūlū le fatu ma papatisoina agaga e 27

Se vaega o le au papatiso e 20 ina ua mae’a le misiona na alagaina e lana auauna Pr Lagolago Levae Ekalesia SISDAC Kuiniselani - Photo : Saga Foa Laulaau
Se vaega o le au papatiso e 20 ina ua mae’a le misiona na alagaina e lana auauna Pr Lagolago Levae Ekalesia SISDAC Kuiniselani – Photo : Saga Foa Laulaau

E tolu vaiaso na faagasolo mai ai le Misiona a le Ekalesia Aso Fitu Samoa Tutoatasi e pei ona vaevaeina i vaega e lua aulotu e 8 o le matagaluega.

O isi aulotu e 4 na tuufaatasia i le nofoaga autu o le ekalesia i Bell Bird Park ma laugaina ai le fe’au e le susuga ia Pr Lagolago Levae.

O le viiga i le Atua ona ua tau lau o le faamoemoe o loo maua pea le malosi e lana auauna, pe a faatusa ai i le tele o tausaga o faataotolia i apulusia o tofaga ona o gasegase ae ua toe maua le avanoa e toe alagaina ai ma folafola le afioga paia a le Atua.

O le ala foi lea na ia faaseetuagalu ai ma le tofi ta’ita’i ona o gasegase ae seei mai i ai le susuga ia Pr Misa Luao Matai’a lea sa ia alagaina le feau i le itulagi na tuufaatasi ai foi aulotu e fa.

O le laugaina o le feau e le susuga ia Pr Lagolago Levae ae sa fai ma organiser le susuga ia Pr Johnny Siofelē ae lagolagosua le susuga i le faafeagaiga ia Luma Alapae Uka.

E 15 mataupu na folafolaina ma faagasolo ai le polokalame o le laveaina o agaga, lea na maua ai le  to’a 20 i le itu na laugaina e le susuga ia Pr Lagolago Levae ma faia ai le papatisoga i le po o le Aso Faraile ma le taeao o le Sapati.

O le isi itu sa laugaina e le susuga i le taitai is Misa Luao Matai’a ae o le Organiser o Pr Su’emalō ae lagolago Pr Tagaloa Fanene ma Pr Isopo e to’a 7 le au papatiso.

Viia le Atua ua iu manuia le taua faaleagaga ma papatisoina ai agaga e to’a 27.