O le po o le Aso Lulu aso 10 o Setema na amata faagasolo ai le faatinoina o le tala ua faaigoa o le Dawnraids, lea o loo faafoeina ma taitaia e le afioga ia Pulotu Canada McCarthy ma Aumua Toafa Teo mai Niu Sila faapea le faatinoina e nisi o tupulaga i totonu lava o Brisbane.
Ua mae‘a atu foi le faatinoina o le Mau ma toe faapupula le pogisa ma le pologa sa faatagataotauaina ai Samoa i aso ua mavae a o lenei ua maua le saolotoga.
O le faatinoina o le Dawn Raids o se avanoa faaauro lea e toe faailoa ai i tupulaga i nei ona po le taimi sa fetuliai solo ai e leoleo Niu Sila nai o tatou tagata sa lei nofomau i Niu Sila i le tele o tausaga ua tuanai.
Sa faagasolo pea lenei tala ae faamae‘aina i le afiafi o le Aso Sa 14 o Setema. E toatele nisi o le atunuu sa malaga atu ma maimoaina lenei tala ma silafia ai foi le tele o vaega sa lei vaaitino i ai i aso ua tea.
Na momoli le agaga faafetai o le alii pule ia Pulotu Canada McCarthy ma Aumua Toafa Teo i le toatele o tupulaga talavou sa faatinoina lenei tala aemaise foi o Agapetos Faaleaga, Diane Nansen ma Adelle Fitisemanu mo la latou foi lagolago aemaise le susuga ia Mika Nansen sa feagai ma le panel i le sound system.
