Ua faamavae atu le Malo ma tagata o Samoa i le Faalapotopotoga o le Apitaga mo Tagata Soifua a Niu Sila (Habitat for Humanity NZ) i le mae‘a ai o le valu o masina o ofo mai le taimi ma le tomai o lenei faalapotopotoga i le toe fausia ai o fale ua faaleagaina o tagata o Samoa na aafia i le sunami o le tausaga na tea nei.
O lo latou alofa mai na faaalia e le Alii Palemia ua leai se taui e mafai ona ofo atu e tagata Samoa ae o le Atua na te toe faatutumu ma taui atu i lo latou agalelei.
O le Faalapotopotoga lenei na o latou saili sui eseese o alii ma tamaitai mai i Niu Sila e fia faigaluega fesoasoani e aunoa ma se totogi mo le toe fausia o mea na faaleagaina i Samoa aemaise i le itu tau i fale.
O se galuega na aofia ai nofoaga ua faaleagaina i le Atu Aleipata faapea Falealili ma isi itu o Samoa e pei o le Aiga i le Tai ma vaega o le motu tele i Salafai na aafia.
O le tele lava o le galuega na taulai ai le galulue a nei tagata i le Atu Aleipata ma o se faaaloalo na faaafe ai i latou na totoe i Samoa e faamae‘a le latou galuega, e le Itumalo o Lepa.
E pei ona silafia ma faalauiloa muamua atu o le faagasologa o polokalame a lenei faalapotopotoga na faapea ona tuu taimi ta‘i masina le malaga mai o inisinia ma tagata kamuta mo le faatinoga o lenei fesoasoani.
O le mae‘a lava o le taimi o ia tagata ma toe foi i Niu Sila ae malaga mai le isi vaega o tagata ua ofo mai lava lo latou tomai ma lo latou taimi mo lenei fesoasoani.
O le oo mai foi o nei Samaria Agalelei, na mafai ai ona o latou galulue faatasi ma kamuta, inisinia, palama ma faieletise o Samoa ma faasoa i ai lo latou tomai i le faatinoga lelei galuega auā maota ua faatutū nei i afioaga na matuā faaleagaina.
“E tumau le fia fesootai pea ma le fia fesoasoani o lenei faalapotopotoga i Samoa ma o le faanaunautaiga foi lenei o le Malo ma tagata o Samoa, ina ia faaauau ai pea lenei fesootaiga tāua”.
O loo iai le faalapotopotoga faapenei i Samoa lava ia ma o le latou matafaioi o le ave lea o le fesoasoani e ala i nonogatupe e leai se tului ae e laititi lava foi le tupe e toe totogi mo aiga ua faamaonia e matuā laititi lava le tupe maua ae ua manaomia lava ni fale e nonofo ai.
O lenei galuega e faatino i sailiga seleni ma sa i lalo o le lālā lea e aofia ai le Habitat for Humanity NZ peitai ua tutoatasi lava le Apitaga mo Tagata Soifua i Samoa lava ia ma ua saili tupe lava i latou mo atina‘e i Samoa nei.
O le Apitaga la mai i Niu Sila le Habitat for Humanity NZ ua galulue ese lava i latou ona o loo lima taitaina pea e se faamalu ua aofia ai le tele o atunuu o le lalolagi i le latou faalapotopotoga.
