Soo se faamoemoe lava e tapuaia ma talosia, e ui lava ina taumate faaato ta‘ita‘i ma faalou lē magā pe tua ma ni ā, peitai e suia uma lagona faailoga fesili pe a iu manuia ma maua se iuga fiafia.
O le ta tonu o le itula e 4pm taimi a Kuiniselani i le Aso Faraile na tea nei, na logoina ai aiga ma loia na tulai mo alo ma fanau Samoa, ua mae‘a le iloiloga a Faatonu e 12 (jury) i le mae‘a ai o le 2 ma le ½ aso o faia le latou iloiloga.
E pei ona silafia o le atoaga foi lea o le 8 vaiaso talu ona faagasolo mai lenei faamasinoga sa nofo tatalo faafeagaiga, aiga ma uo.
O mau na finau malosi ai le loia sa tulai mo leoleo, ia molia uma nei alo Samoa i le fasioti tagata faamoemoeina ona o le latou faamoemoe ia fasioti Richard Saunders, ma e tele vaega sa taumafai malosi ai Mr Todd Fuller, le Prosecutor mo Leoleo ina ia malo lana finau ia faasala nei tamaiti i se taimi umi i le falepuipui, ona o le maliu o Mr Saunders, o se taupulepulega sa faia ma le mautinoa.
Na matuā faatumulia le Fale Faamasino i leoleo ma sikulati mo le leoleoina a o tulai se sui o faatonu o le to‘a 12 mo le lauina o le iuga; ma o le faaiuga ua solofua ese ai le moliaga o le fasioti tagata faamoemoeina (murder) i alii Samoa e toafā, ae ua molia uma i le fasioti tagata paivalea (manslaughter).
O nisi nei o i latou:
Vaai Emelio – lē faamaonia moliaga o le fasioti tagata faamoemoeina, ae faamaonia i le fasioti tagata paivalea, ma isi moliaga e 2 o le faaoolima ma le faaaogāina o auupega.
Likisone Siliga – lē faamaonia moliaga o le fasioti tagata faamoemoeina, ae faamaonia moliaga o le fasioti tagata paivalea, ma isi moliaga e 2 o le faaoolima ma le faaaogāina o auupega.
Len Wilson – lē faamaonia moliaga o le fasioti tagata faamoemoeina, ae faamaonia moliaga o le fasioti tagata paivalea, ma isi moliaga e 2 o le faaoolima ma le faaaogāina o auupega.
E iai se alii e lē o mafai ona ta‘ua lona suafa ona e i lalo o le 17 tausaga le matua (juvenile).
Ua lē faamaonia ona moliaga o le fasioti tagata faamoemoeina, ae faamaonia moliaga o le fasioti tagata paivalea, ma isi moliaga e 2 o le faaoolima ma le faaaogāina o auupega.
O isi tamaiti laiti e toafā, na faamaonia lava moliaga o le faaoolima matuiā ae lei faia le faamasinoga, lea ua faatonuina nei e le Faamasino o Justice Atkinson, o le aso 3 ma le aso 9 o Me o le a tuuina atu ai faasalaga mo nei alii Samoa e to‘a 8, a o le isi toatasi ua tatala nei i tua ona e leai ni faamaoniga o lona aafia i le faalavelave.
Na faafetaia e le tamaitai faamasino aiga uma o nei alii ona o le faaaloalo sa latou faaalia i le 8 vaiaso o le faamasinoga.
Na ia faafetaia foi le community e tusa o le lagolagoina o alo ma fanau.
Sa faamaise atu foi le faamasino i le aiga o lē ua maliu ona o le lava onosai, e tusa o le faaiuga ua iai nei, e ala lea i lona faamanino atu e leo ia sa faia le faaiuga, poo Loia, o le faaiuga ua autasi i ai faatonu sa filifilia i le amataga o le faamasinoga.
Na iu manuia le faagasologa o lenei faamasinoga mai le 8 vaiaso.
E leai lava se vevesi na tulai mai e ono taui ma sui ai le aiga o le alii Apoliki o Richard Saunders, ae na malupuipuia ona o le galuega fita a leoleo faapea le au sikulati.
