Ua maua le paga fou a Lupesoliai Laauli Joseph Parker mo lana fusuaga ile Aso Toonai 6 Me. Ole alii o Razvan Cojanu o Romania, numera 14 ile WBO.
Ae ole fusuaga foi lea ua sui le nofoaga e fai ai. Ua sifi nei mai le Vectra Arena i Aukilani ile Vodafone Arena i Manukau City.
O lenei suiga ona ua lē mafai ona fusu Parker ma lana paga sa uluai fuafuaina la te fetaui, le alii o Hughie Fury mai Peretania.
Ina ua faafuasei ona togi mai le solo a Fury i totonu ole maea ile Aso Sa na tea nei, na faatatope ona toe saili se isi paga e sui tulaga, ma filifilia ai Cojanu mai Romania e sui tulaga, O Cojanu e lona 14 ile lisi o tama fusu ale WBC, oloo sauni foi e fusu ile aso 6 o Me.
Ua aliali mai foi, ole alii lenei o Razvan o ia ole paga sipa a Laauli. Na fesoasoani e tapena le fusuaga a Parker ma Sacha Dimitrenko o Rusia ile masina o Oketopa ile tausaga ua mavae. Na faaaogā foi e Kevin Barry le alii lenei e sipa ma Parker i lana tapenaga mo le fusuaga ma Hughie Fury.
Na faailoa e Cojanu ina ua taunuu mai i Niu Sila, ua sau o ia e ta‘u le sese o Parker. O lona manao foi lea ia manumalo o ia ile fusuaga. O ripoti ua maua mai i faipelega a Parker ma Cojanu ua ta‘ua ai e lei palasi lava Cojanu ile tu‘i a Parker i faipelega. E faailoa ai iina le lelei foi o lenei ali.
Ole tala lea a Kevin Barry ma le Duco Events, ole a sili atu ai le fusuaga lea a Parker ma Cojanu. Auā e tau fai lelei uma i laua ma ua masani foi le tasi ile fusu ale tasi. Ae ana faapea e fusu Parker ma Fury, e mautinoa le vave uma ole fusuaga auā ua manino nei e matuai lē sauni lava Fury e fetaui ma Parker.
Faatusa ia Parker e maualuga atu le Cojanu 6′ 7″ ile 6′ 4″ le umi o Laauli Parker. Ole mafuaaga lea na faaaoāa ai lenei alii mo tapenaga mo Dimitrenko ma Fury. E le gata la ile maualuga atu ia Parker ae e umi atu foi lana so‘a ile so‘a a Parker 76″ / 193cm a Parker ile 83 inisi / 211 cm a Cojanu.
Ae fai si maualuga o malo a Parker ile tu‘ioti e 82 pasene ile na‘o le 50 pasene a Cojanu.
Ile isi faatusatusaga, ua 22 fusuaga a Parker aunoa ma se faia‘ina ile 18 a Cojanu ae lua faia‘ina ile 16 o manumalo.
O ai Razvan Cojanu?
Tausaga: 30 tausaga
Aso Fanau: 10 Mati 1987 i Voinesti, Romania (Europa i Sasae)
Nofomau: California, USA
So‘a: 83 inisi / 211 cm
Maualuga: 6′ 7″ / 201cm
Fusuaga: 18
Manumalo: 16
Faia‘ina: 2
Taamilosaga: 68
Tu‘ioti: 50 pasene
Faasologa o Fusuaga
Tesema 2016 vs. Zhi Wu Yu (Saina) Manumalo ile KO
Oketopa 2016 vs. Christian Martinez (Mexico) Manumalo ile TKO
Ianuari 2016 vs. Grover Young (USA) Manumalo i ‘Ai
Aperila, 2017 vs. Donovan Dennis (USA) Faia‘ina ile KO
Fepuari 2015 vs. Ed Fountain (SA) Manumalo i ‘Ai
Novema 2014 vs. Darius Shorter (USA) Manumalo ile TKO
Iulai 2014 vs. Manuel Pucheta (Argentina) Manumalo ile TKO
Me 2014 vs. Rodricka Ray (USA) Manumalo ile TKO
Mati 2014 vs. Avery Gibson (USA) Manumalo i ‘Ai
Fepuari 2014 vs. Tobias Rice (USA) Manumalo i ‘Ai
Iulai 2013 vs. Alvaro Morales (Mexico) Manumalo i ‘Ai
Aperila 2013 vs. Paula Mataele (NZ) Manumalo ile TKO
Setema 2012 vs. Yohan Banks (USA) Manumalo i ‘Ai
Me 2012 vs. David Johnson (USA) Manumalo i ‘Ai
Fepuari 2012 vs. Bekim Pergega (Kosovo) Manumalo ile TKO
Ianuari 2012 vs. Rodney Hernandez (USA) Manumalo i ‘Ai
Iulai 2011 vs. Kourtney Boden (USA) Manumalo i ‘Ai
Mati 2011 vs. Alvaro Morales (Mexico) Faia‘ina i ‘Ai
