Luluu tupe ile tomai o pisinisi laei

Se vaaiga i alii ma tamaitai oloo faalauiloaina nisi o laei ile vaiaso o faaaliga o su‘iga o laei eseese ua saunia e alii ma tamaitai Samoa ua atinaeina lea tomai
Se vaaiga i alii ma tamaitai oloo faalauiloaina nisi o laei ile vaiaso o faaaliga o su‘iga o laei eseese ua saunia e alii ma tamaitai Samoa ua atinaeina lea tomai

A toe tepa ile 20 poo le 30 tausaga ua tuanai i Samoa, e toe manatua ai nai tina sa faia le taleni male tomai ole tipiina o ofu ma su‘i.

O taimi pe a oo ile lotu a tamaiti e vevesi uma mātua e faatau ie ona ave lea ile au suisui e saunia ai ofu ole fanau, auā e sili lea ona taugofie nai lo laei e faatau mai faleoloa. Toe silasila la ile tulaga ua iai nei Samoa, ua lē na‘o tamaitai ua faia lea tomai ae ua oo lava foi ile itupa o alii.

Nisi o laei sa faaalia i lea po, sa saunia ma mamanuina e Beyonce Faailo ole Soonalani Hive
Nisi o laei sa faaalia i lea po, sa saunia ma mamanuina e Beyonce Faailo ole Soonalani Hive

Ole autu lea ole vaiaso ua mavae atu nei sa faia ai se faaaliga poo festival e faalauiloa ai lenei tufuga aao o alii ma tamaitai ile tipiina o sikaili eseese o laei ma su‘i.

Photo : Stef Schwalger
Photo : Stef Schwalger

Fai mai le susuga Seiuli Allan Vaai ole Peresetene ole Samoa Arts Council, o ia e leai sona silafia ile saunia o laei ae ua ia faamaopoopo le tuufaatasia ole faaaliga ona tasi lea o tomai e maualuga tele i atunuu i fafo auā ole tagata e lelei ile saunia o laei ile tipiina ma su‘i ose tagata sili lea ona faamanuiaina i tupe maua auā e alumia ma manaomia e tagata e fiafia i laei ma o latou sikaili.

Na saunoa le afioga ile Masiofo ale Ao ole Malo o Filifilia Tamasese ile amataga ole faaaliga ma ia ta‘ua ai, o ia foi e leai sona tomai faapea ae o lana molimau ole saunia o laei e soo se agavaa ma taleni o umia ese tagata e leai se eseesega mase tasi e agavaa ile saunia o laei.

E to‘a sefuluono tagata e fou ile tomai lenei sa faaali ai a latou laei ile faaaliga, ma ole po ole Aso Toonai na tea nei na matuā tumu ai autafa ole vai taele ole faletalimalo ole Tanoa Tusitala ile toatele na molimauina le po mulimuli ole faaaliga.

“Oute iloa lava e a‘u ole tasi lenei o agavaa ma tomai ua alu alu lava i luma le numera o tatou tagata ua fiafia iai, ma ose mea lelei tele auā ole a mafai ai foi ona maketi atu i fafo ituaiga o laei ma sikaili e su‘iina ma saunia e o taou lava tagata”, ole molimau lea ase tasi o tina sa auai ile faaaliga.  O lana molimau foi ose tomai lenei ua tatau ona siitia lona aoaoina i totonu o aoga tau matata eseese i Samoa.

O nisi o laei sa faalauiloa ile faaaliga ua na ole tafe lauga‘o iai o faua o nisi o alii ma tamaitai talavou ona e fai si taugata.

Ose tasi o puletasi e $500 lona tau ma ole molimau lava ia ale tusitala sa matamata ai foi ile faaaliga, seiloga e maua ni tupe pei o ē maumea ma lava le faasoa ona gafatia lea oni ituaiga o laei faapea mo ni uo poo ni meaalofa foi i aso faapitoa.

Ole a faia i tausaga uma lenei faaaliga ma ole tausaga nei ole faaaliga muamua lea. Faaalia e Seiuli Allan Vaai, ole tausaga fou e tatau ona sili atu le matagofie o ni laei ole a faalauiloa ai, ma ole fautuaga mai le peresetene, afai e fia maimoaina e tatau ona matuā tapena lelei le ato fufusi ini tupe auā e alu ai male faatautu‘i o laei eseese.

Se tasi o laei sa mamanuina e Dane Frabicius ole DMF - Photo: Alexia Rae
Se tasi o laei sa mamanuina e Dane Frabicius ole DMF – Photo: Alexia Rae