E $300,000 le tau o le hall o le aoga tulagalua a le afioaga o Laulii ua amata ona fausia. E 60 afe le tupe na sailia e le nuu na amata ai le galuega, lea sa fesoasoani malosi i le sailia o lea seleni tele, nisi o tamafanau a le nuu o loo mau galuega lelei i le Malo, ma pisinisi tuma‘oti.
Peitai e telē se tupe o loo manaomia mo le galuega, o le mafuaaga lea o le saili atu i le atunuu o se fesoasoani e ala i se leitiofoni a le afioaga sa faatino i le Aso Toonai na tea nei, lea na maua ai le silia i le $60,000 tala.
E na o le lima itula na faagasolo ai le faamoemoe i luga o le leitio faasalalau a le atunuu le 2AP mai le 9 i le taeao i le 2 i le aoauli, ae taulimaina e Laulii lea seleni tele, na tauala mai i le agalelei o nisi o alo ma fanau o le nuu e le gata i Samoa lava ia, a o atunuu i fafo.
O le faafetai lea a le afioga Leniu Tali‘ulu Vainiu ma le mamalu o le afioaga i ona paia ma mamalu faalupe, aemaise o le nuu atoa ona o le talisapaia e le atunuu ma tamafanau a Laulii o le faatalauula mo se fesoasoani tupe. O loo tatala pea le avanoa mo i latou e fia lagolagoina lenei galuega, e mafai ona fesootai i le afioga Leniu Tali‘ulu Vainiu i Samoa, i le telefoni 006857595449 e faailoa i ai lau foai ma le auala e faaoo ai i Samoa. O le hall o loo fausia e lata ile nofoaga o loo iai le aoga tulagalua, ma na faaalia e le afioga i le Sa‘o Faapito ia Leniu, e tele nisi o taumafaiga o le a faaaogā i ai.
“E le gata e faaaogā e fanau a le nuu e silia i le toluselau o loo aooga i le taimi nei, ae o le a faaaogā foi mo nisi o atinae sailitupe a le nuu, e pei o taaloga bingo, e mafai foi ona fai ai faaipoipoga poo aso fanau ae totogi.
O lona uiga e toe sailia ai seleni mo nisi o fuafuaga a le nuu mo le lelei au i luma o tagata uma aemaise o fanau a Laulii,” o se finagalo lea o le Afioga Leniu ina ua fesiligia a o lumanai le faamoemoe.
O se atinae muamua lea ua lotolotoi ai le afioga i le Sa‘o Faapito, ae e lei atoa se tolu masina talu ona filifilia e lona aiga e tauave le suafa faasa‘osa‘o o le nuu lea sa seei ai le Afioga Leniu Tofaeono Avamagalo ua tuumalo.
E ui ina maua le $60 afe ma ona tupu i le leitifoni, ae o le tatalo a Leniu ma le nuu i tamafanau a Laulii o loo aumau ma faamautu i atunuu i fafo e pei o Niu Sila, Ausetalia, Amerika ma soo se atunuu, o loo fia maua pea se fesoasoani tau tupe ina ia maua le tau atoa o le galuega e $300 afe tala.
