I le masina ua mavae atu na feiloai ai se tasi o alo o Samoa o loo galue i totonu o Niu Sila nei i le Matagaluega o le Va i Fafo poo le Ministry of Foreign Affairs i Manukau, le alii ia Alafale Lesa, ma o ia foi sa avea ma Peresitene o Amelika i tausaga ua mavae ia Bill Clinton i se fonotaga sa faia i Melbourne i Ausetalia sa faaautu i le pulega ma le saofaiga o Atunuu Soofaatasi (UN Summit).
O se avanoa tāua tele sa fefaasoaa‘i ai ma Bill Clinton i le mataupu o loo siitaua ai pea malo e pei o Isaraelu ma Gaza, ma le anoanoai o isi mataupu sa agai i ai faatalanoaga i lea fonotaga tāua. Na ta‘ua e Alafale Lesa o se avanoa lē aumaua na feiloai ai ma Bill Clinton faatasi ai ma isi sui usufono e toasefulu sa auai e feiloai atu ia Bill Clinton, ma e lē o usufono uma sa maua lea avanoa.
O Alafale Lesa o se tasi lea o sui usufono talavou sa auai i lea fonotaga tāua, e fua i le toatele o sui auai o lea fonotaga e silia i le ta‘i 40 tausaga agai atu i le 50 tausaga le matutua, sa faatasi ai foi i lea fonotaga nisi se toaono o ni tagata suesue faapitoa ma le faalapotopotoga o Atunuu Soofaatasi i sailiiliga i le Vaalele ma le faalavelave MH17 lea o loo talitonuina na fanaina i lalo e le Rebels i Ukraine.
Sa faapea foi ona faataunuuina ai se sauniga faamanatu e manatua ai i latou uma sa maliliu ai i lea faalavelave; na matua faaseā Bill Clinton ma le lē fiafia tele i ē na faataunuuina lea faiga lē talafeagai ma le maualalo.
Sa maua ai foi ma le avanoa e lūlūaao ai ma lē sa avea foi ma Palemia o Niu Sila i tausaga e tele ua mavae ia Helen Clarke. Mo le silafia o Alafale Lesa o se taitai Autalavou mai le Ekalesia EFKS a Weymouth, mai le afioaga o Saanapu, Falealili, ma Sapapalii, ma o se talavou ua atoa nei lona 24 tausaga le matua.
