O le vaiaso lenei ua faagasolo ai galuega auā le unaiga o le faitautusi a fanau aoga i le atunuu. O se lu‘i ua lua nei tausaga o agai le Matagaluega o Aoga, Taaloga ma Aganuu e tali atu i ai ona o suesuega i tausaga ua mavae ua maua ai le fai ifo o le malamalama o fanau i le itu tau i le faitautusi atoa ai ma le tusitusi.
O le tasi o suiga tele i aoaoga a le fanau i lenei vaitaimi aemaise lava i fanau o aoga tulagalua (Primary Schools) o le itu lea ua faamalosia le uluai itula ua faia ai faitautusi a fanau ona faatoa amata loa lea o isi mataupu o le aso.
O le amataga la o lenei vaiaso i luma o le maota o le Malo ua faagasolo ai tauvaga tusigatala, tauvaga faitautusi ma tauvaga faitauga solo i fanau o aoga eseese i Upolu ma Savaii, Manono ma Apolima.
Sa iai le alii Palemia i le tatalaga o lenei faamoemoe ma lana lu‘i, e fai o le taumafai e unai fanau i nei tulaga tāua o le ola aoaoina, ae e tatau ona vaavaai poo fai le tiute a faiaoga e ala lea i le lelei ona faailoa i fanau mataupu aemaise lava foi le faitautusi ma le tusitusi.
Faaalia e le susuga Tuilaepa Lupesoliai Sailele Malielegaoi, o le tele o le taimi ua agai le malo i fanau ma taumafai ina ia saili le mafuaaga o le lē lelei o le faitautusi ma le tusitusi ae o le lu‘i tele lea i faiaoga o le faatinoga o a latou galuega e aafia ai lava le ola aoaoina o le fanau.
O le faamatalaga a le Palemia ua oo lava i le tusiga o mataupu i luga o le laupapa ua paie faiaoga e fai ma e matuā telē le aafiaga o le fanau ona o le faatinoga o le latou galuega.
O lea ua tofu lava le aoga ma le latou polokalame e unai ai lenei vaiaso faapitoa, ma ua fesoasoani foi kamupani e pei o le faletusi o Samoa le SSAB atoa ai ma isi faletusi i le taumafaiga ia lelei le faitautusi a le fanau.
O faasalalauga ua alu i luga o televise i le masina atoa lenei ua faapea ona unai ai ma mātua ina ia faaavanoa o latou taimi e faitau ai i fanau. O le aiga o le faleaoga muamua lea e pei ona unaia i lenei faalauiloa ma o le tamaititi e faitautusi mai i le laitiiti o le tamaitiiti foi lea e mautinoa le ola aoaoina i le tuputupu a‘e.
O le pa‘ū o le faitautusi i Samoa sa tele ina tuuaia ai le lē toe faia o faitautusi i aoga faifeau e pei ona sa masani ai i augatupulaga ua tea, ma o le unai la lenei ua faia e le matagaluega ina ia toe fafagu i mātua le tāua o le faitautusi ma le lu‘i a le Palemia i faiaoga ina ia fai lo latou tiute ma ia unai galuega ua o latou tauto e faatino, o le lelei ona aoai o fanau i vaega tāua nei o le ola tuputupu a‘e o le faitautusi.
O le vaiaso atoa lea e faia ai tauvaga a nofoaga eseese ma le Matagaluega o Aoga e faamanatu ai lenei itu tāua o le ola aoaoina.
