Asia ele Tamaitai Palemia Jacinda Ardern ma nisi o sui ole malo le Stage a Samoa

Asia ele Tamaitai Palemia Jacinda Ardern ma nisi o sui ole malo le Stage a Samoa

Ole taimi muamua lenei ua asiasi ai le afioga ile Palemia o Niu Sila Jacinda Ardern faapea le afioga ile Minisita o Tagata Atumotu ole Pasifika, Aupito Su’a William Sio ile polokalame ole Polyfestival a fanau aoga talu ona tulai mai le faigamalo fou ole Labour. Na asia le stage a Samoa ele tamaitai Palemia faapea malo faaaloalogia sa auai faatasi ai ma le Minisita Aupito Su’a William Sio, ma saunoa ai le afioga ile Minisita e faafeiloai le paia ma le mamalu o mātua, faapea faiaoga ma fanau aoga sa auai ile Polyfestival.

E fā aso sa faatinoina ai polokalame ole Polyfestival o aso foi ia sa faatasi atu iai le afioga ile Minisita ile lagolagoina ole faamoemoe o fanau aoga. Ole asiasiga ale Palemia ma sui ole malo, na maua ai le avanoa e saunoa ai le afioga ile Minisita ia Aupito ile tāua ole polokalame lenei ole Polyfestival mo fanau aoga.

Ua avea le Polyfest ma nofoaga e aupito sili ona toatele tamaiti talavou mai aoga maualuluga o lea ua mafai ona potopoto mai iai. E ivaafe tamaiti aoga faatasi ai ma le selauafe o tagata ia e auai mai iai. Ole Polyfest la, ua avea e pei ose faailo ia Niu Sila ma le Pasefika atoa, auā o Niu Sila lea oloo iai tamaiti e faaaogāina gagana e lua (bilingual). E nonofo i Niu Sila ae latou te faaaogāina lava gagana a o latou atunuu na soifua ma ola a’e ai.

Ole tāua foi ole Polyfestival e faailoa atu ai ia Niu Sila atoa, e matuā tatau ona iai le lagolago ma le opogi ale malo i polokalame a fanau. E tāua foi lenei faamoemoe e faailoa atu ai i fanau aoga le faafetai oloo iai a latou taleni oloo mafai ona faaaogāina ai gagana e lua. Ole faafetai ale Minisita i fanau aoga ma faiaoga, ole naunau ile gagana ma le aganuu e mitamita ai.

E tatau foi la ona latou aveina le lesona oloo latou maua mai ile Polyfestival ma auala e tausinio ma finau ai ina ia maua foi le poto i mataupu eseeese i totonu o lenei atunuu. O lona uiga, ia aua ne’i mafuli le tauva ile mea e tasi, ae ia tauva lava i mea uma mo le manuia o lo latou lumanai. E tāua le gagana, tāua le aganuu, tāua foi le faaperetania, tāua mataupu uma auā e maua ai le manuia ma le lumanai lelei.

Ole ala ile pule ole tautua, tautua i aiga, ekalesia ma le atunuu, ia tautua i soo se avanoa, ma le isi vaega poo le ā lava se tofi e avatu, ia aua le manatu faatauvaa ile tofi, ae faaaogā uma tofi e fai ai le tautua.

Saunoaga ale Palemia Jacinda Ardern

Ole saunoaga faafetai ale tamaitai Palemia ile stage a Samoa, na ia faafetai ai i aoga uma ile faatāuaina o lenei polokalame i tausaga uma. Ose mea fiafia ia te ia ole iai ole Polyfestival e faaali ai le taleni eseese ale fanau i Niu Sila. O lona naunautaiga ia faaaogā le tulai mai ole autalavou e avea ma ta’ita’i i totonu o aoga ma totonu o aiga.

Ole tāua ile tamaitai Palemia o tupulaga talavou, ile lagolago pea ma opogi le autalavou aemaise i latou ua filifilia e avea ma taitai. Faamanino ile saunoaga ale Palemia lona tulai mai i tiute ma galuega seia oo lava ina ua avea o ia ma taitai ole malo. Auā ua tuufesili nisi pe sa iai se moemitiga ia te ia e avea ma Palemia, ae tali Jacinda e leai, o lana lava tautua i lana komuniti ile mea sa faigaluega ai i Halmiton, ma lona naunau ile aoga.

Pei o mea uma ia sa aogā i lona olaga, ma o lea ua fetaui lelei ma le lagolago ale party e avea ai o ia ma ta’ita’i. O lana lu’i la i talavou aoga, ia aua ne’i manatu maualalo le tamaititi ia na ia lava ia, ia saili pea le mea e fiafia iai ma maua ai sona malamalama i mataupu eseese.

Ole mae’a ai ole asiasiga ale Palemia ia Samoa, na latou asia ai loa le stage a Niue ma Rarotonga auā o atunuu ia sa auai mai nisi o a latou aufaafiafia mai i o latou atunuu e molimauina le Polyfestival i lenei tausaga.

Comments

comments