O le vaiaso asau i le Aso Gafua 9 o Novema 2015, o le a toe valaau ai le talosaga a le afioga Peseta Vaifou Tevaga o loo finauina ai se poloaiga a le faamasinoga e mafai ai ona ulufale i le lotoā o se kamupani nonu i Vaitele e ta’ua o le Local Partners $ Associates Ltd, o loo iai ni ona sea (shares) ma o ia foi o se tasi o faatonu poo Director.
O le kamupani foi lea o loo aafia ai le Fofoga Fetalai o le Palemene le susuga Laauli Leuatea Polataivao ona o le taumafaiga o le nonu e pei ona atinae ai e lona nuu o Sasina le laau o le nonu.
O le Fofoga Fetalai ma nisi sui e toalua o le au faisea e aofia ai ma se tasi o tusitala sinia o loo faasaga i ai le talosaga a le alii Faipule o Faasaleleaga Numera 4 ona o se latou faaiuga ua oo i leoleo ua faasā ma tapu ai le afioga Peseta Vaifou Tevaga ona toe ulufale i le lotoā o le kamupani, ma ua tapu ai foi ona ia toe tuvae i fale ma ofisa o le kamupani nonu.
O le vaiaso na tea nei na fofogaina ai mo le taimi muamua le talosaga ae ua toe tolo atu i le vaiaso fou e faatali ai se tali a i latou o loo faasaga i ai le talosaga. O le afioga i le tamaitai loia Leulua‘ialii Olinda Woodroffe o loo tauaveina le talosaga a Peseta mo se poloaiga.
O lana saunoaga mai o le mataupu o loo mafua ai ona faasā le alii faipule ona o ni feteenaiga i le va ma isi sui faisea ma le Fofoga Fetalai. “O mataupu lava e agai i le pulea o le kamupani aemaise o tupe faapea se nonoga tupe i le NPF o loo faamau i le fanua o le alii faipule”.
Fai mai le loia o le 50 pasene o sea o le kamupani o loo umia e Peseta, ma o lona fanua foi o loo faatu ai le kamupani.
“E faapefea i se tagata o loo ia umia le limasefulu pasene o sea ona noatia lana aiātatau e ulufale ai i le lotoā ma le fanua aemaise o le avanoa e silasila ai i faamaumauga tau tupe a le kamupani”, na saunoa mai ai le tamaitai loia.
O le afioga Maiava Visekota Peteru o le loia lea mo le kamupani nonu. Na fesiligia mo sona finagalo ae sa ia lē mafai, i lana saunoaga e lei lava se taimi e tagai ai i le mataupu.
Ae mo le loia a Peseta le afioga Leulua‘ialii Olinda na ia faaalia e miliona ma miliona tupe a le kamupani o loo aafia i le tagi autu a Peseta e lei oo i le taimi e valaau ai i luma o le faamasinoga.
“O lea e fia talosaga muamua i se poloaiga e faataga ai lana afioga ona ulufale i le lotoā ma fale ma silasila i faamaumauga tau tupe uma aemaise o le pulea ma le faagaioia o le kamupani”.
