Ua lu‘i e se tasi o tamalii na faamaonia ni moliaga o faiga faaalatua i le palota tele o le 2011 se faaiuga a le ofisa o le Komesina o Faigapalota e lē mafai ona tauva i le palota tele o le tausaga fou, ona e lei atoa le fā tausaga o le faasalaga o loo aiaia mo sui tauva e faamaonia ni o latou aafiaga i ni faiga faaalatua.
O Aperila o le tausaga e 2011 na amata ai le faasalaga lea faasaga i le afioga Alai‘asa Filipo Schwartz Hunt sa toe soloia lona tofi faipule mo le itumalo o Anoamaa i Sasa‘e, ma ua atoa ia Aperila o le tausaga nei. Peitai o loo faapea mai le ofisa o le komesina o faigapalota e lē o agavaa e avea ma sui tauva o le palota o le 2016. O le autu lea o le talosaga ua faatoai nei i le faamasinoga maualuga e le loia o loo tulai mo lea mataupu le susuga Rosella Papalii.
O le valaauina o le talosaga i le amataga o lenei vaiaso na faailoa ai le tuuina atu o se talosaga a le Loia sili a le Malo o loo tauaveina le itu a le ofisa o le komesina o faigapalota e faaleaogā ma aveesea ai le tagi.
O lea la ua taatia atu i le aso 24 o le masina nei e tuuina atu ai se tali a le itu tagi i lea talosaga. O le aso foi lea o le a iloa faamautu ai se aso e suesueina muamua ai le talosaga a le Loia sili ona o loo naunau le loia a le afioga Alai‘asa Filipo e vave ona tagofia le mataupu ona e lē o toe tele ni masina o totoe a o lumanai le palota tele a le atunuu ia Mati o le tausaga fou.
