Lua itula, maua le $6,000 a le Tausala Tina Metotisi, Liverpool

O le upu a le Tusi e o faatasi le faatuatua ma galuega, o le auga lea o le tulaga matagofie na taunuu i ai le Tausala a le mafutaga a Tina Metotisi a Liverpool.

O le susuga i le faafeagaiga o le afioga i le Sea o le Sinoti, Rev Halefoti Seloti ma le faletua ia Seuoletoi Seloti o loo tausia le Ekalesia.

O le faletua lava ia Seuoletoi Seloti le Peresitene o le Auuso, o le tausi ia Siulepa Arasi le Failautusi a o Tuugaita Aumalesulu le teuoloa. E $6 afe le aofai o sa latou tupe na maua auā le atina‘e masani o le Ekalesia mai matafale e latalata i le tolusefulu.

Na amata i le sefululua i le aoauli lenei faamoemoe i le Maota o le Ekalesia i Ashcroft Liverpool. E pei o le masani o Aso faapenei, na saunia le tatalo amata e le tamā o le galuega sosoo ai ma le tausala ma peleti eseese a matafale. O pesepesega mālie ma siva faapoula na vaaia.

O matafaioi a le auuso o le faaleleia o meatotino a le matagaluega e pei o le Malumalu ma le maota o le galuega faapea le faatagisia mai e le Ekalesia tele.

O se tasi nei o Ekalesia ua mautu lelei lona malumalu ma le maota o le faafeagaiga i Sini.

Sa auai atu foi i le sauniga tele i le tausaga ua tuanai auā le afio mai o le Palemia o Samoa, Afioga Tuilaepa Sailele Malielegaoi i Sini.

O lenei lava Ekalesia na lotu ma toonai ai le Alii o Saili poo Faafiaula Vaisagote mai le ata Tifaga o le Tulafale, ina ua asiasi mai i Sini ma faia ai foi faaaloaloga a le Ekalesia.