Ole alii talavou o Junior Pati ua faaigoaina nei ia Multi Pitbull i lona igoa ua fusu ai nei, ua 34 le matua o lona soifua o lea ua tapena atu nei nate lu‘iina fusi e lua ile UBF Asia Pacific Cruiser Weight Title ma le NZNBF Cruiser Weight Title ile aso 8 o Iulai ile Auckland Netball Centre 7 Alison Ferguson Dr, St Johns.
Ole alii malosi mai Palmerston North ia Lance Bryant lea ole a fetaui ma lenei alo ole atunuu i fusi nei e lua. O Junior Pati ua 21 ai nei tausaga talu ona ia faia lenei taaloga ona sa amata mai lava ona fusu a‘o aoga ile kolisi o Tagaloa, ma ose tamaititi finau ma le malosi e pei ona ta‘ua e lana faiaoga le susuga ia Mal Ainuu Siaosi.
Ole tausaga e 1996 na amata ai ona fusu lenei alii ma o lea ua savali nei ile 21 tausaga talu ona tui pea ona foliga e tagata i lenei lava taaloga. Ole 2001 na siitia ai loa le tulaga o lana taalo ile fusu faapolofesa.
Peitai e lei alualu ai pea lea lelei o lana taalo ile amataga, ona sa iai lava taimi na alualu ai le faaaogāina ole taleni ua iai le agaga ole faavaivai ma le musu i lenei alii pe a oo ile taimi ua luluti mai ai tuinanauga ile vaitau o tupulaga talavou ma tauau atu ai ina tosina iai le loto ae tuu ai le taaloga.
Ma ole mafuaaga lea na tele ai ina faia‘ina le alii o Junior Pati ile tele o ana fusuaga ona ua leai se koleni, ma ua lē ano foi ile taaloga, ae a oo ile taimi ole a fusu ai ona faatoa puga lea i totonu ole maea e faaaogā ai lona poto masani ma le malosi ile taaloga ae galo ai oloo faatuputupulaia ai le tele o ana faia‘ina i totonu ole taamilosaga ma e le ni maka lelei lea mo ia i lenei foi faagatama.
Ole 2007 na maua ai loa e Toaletai David Tua lenei alii talavou ma amata ai loa ona toe galue Toaletai e fai le galuega lelei e toe faamalosia ai le olaga naunau o Junior e faaauau lana taleni.
Tele o taimi na fusu ai Junior Pati e fusu lava na ole tupe, ae ina ua oo ia Toaletai ma faamalosi ai lenei tamalii ole atunuu, ole lelei ole koleni ma fusu e sii ai i luga le tele ole tupe, ma ete ono ausia ai le maualuga ole tele ole tupe e tatau ona e maua, ma o iina na toe sagatonu ai le mafaufau o Junior ma ia iloa ai le mea e tatau ona ia faia auā le agai i luma o lana taleni.
Tele faamalosi, tele foi metotia ma auala na fesoasoani ai le afioga ia Toaletai ia Junior ma o iina foi na toe amata ai ona toe agai lenei uso ile manumalo ise taaloga pe a oo ina fusu.
Ole susuga ia Mal Ainuu Siaosi ole faiaoga lea a Junior Pati lea ua iai ile taimi nei ma ose tamalii Samoa foi ua lava lona tomai ma le silafia i lenei faagatama, aemaise ai o lona iloa ile koleniga o tagata fusu. Talu mai ona toe foi le tele o manumalo ile alii o Junior Pati ma ua foliga mai ai ua toatele tagata fusu o lea ua taumafai e luiina lenei alo o Samoa ile fusi.
Ole fusi numera fa lea ale lalolagi le UBF lea ua sauni ai nei Junior e pigi ai ma le alii o Lance Bryant faatasi ai ma le fusi lea ole NZNBF Cruiser Weight Title. Pei ona molimau le alii o Junior ua tele se suiga ua iai ana koleniga talu ona ia filifilia le susuga ia Mal Ainuu Siaosi, auā ole galuega tonu lea a lea tamalii ole toleniina o tagata taaalo fusu, ae ole susuga ia Toaletai David Tua sa maua mai ai lona iloa ma le poto masani e faaaogaina ile taaloga.
Ua tolu manumalo o Junior Pati talu ona i lalo ole taitaiga o lana pulega fou lea ua iai, ma ua ia faailoa foi le tulaga lelei ma le siitia maualuga o ana tapenaga lea ua iai auā le lu‘iina o fusi nei e lua.
O le lagona ole alii o Junior ile la taaloga lenei, e fai lava si faigata, ma ole taaloga lenei e lua lava auala e tatau ona manumalo ai, ole sue ole avanoa e malo ai i ai, ma le saili ole auala e maua ai lana paga ile tui oti, ao ii o lea faaaogaina ai metotia ma auala lea sa aoaoina ai ia e Toaletai David Tua faapea lana faiaoga fou lea ua iai le susuga ia Mal Ainuu.
O Lance Bryant oloo ia umia le fusi ole siamupini ole lalolagi le IBO, ma oloo fusu foi ile aupaga ole Cruiser Weight, ao lea ua pipi ai le lui a Junior Pati o loo fusu nei ile aupaga ole Heavy Weight ile fusi lea lona fa pito i lalo ole lalolagi.
Ae afai ae manumalo Junior Pati ile taaloga lenei ile aso 8 o Iulai, ma ose faitotoa tele lea ole a matala mo ia e ono sao atu ai ma fusu i nisi o fusi ole lalolagi olo ile pito i luga e pei ole fusi oloo ia Laauli Josepg Parker.
Ile faasologa o tama fusu faapolofesa ile lalolagi oloo tulai mai ai le alii o Lance Bryant ile tulaga 192 o tama, ao le susuga ia Junior Pati o loo saofai mai ile numera 300 ile faasologa o tama fusu ile lalolagi. Afai ae manumalo Pati ile taaloga lenei ole a tele se sii maualuga o lona tulaga ile 99 o lana numera olea saofai ai ile faasoloina o tama fusu.
Ua suia nei le igoa fusu o Junior Pati ia Multi Pitbull ona ose tagata na amata mai lana fusu ile fusu taufeaa poo le UFC seia oo mai lava ina fusu faapolofesoa ile taaloga o loo iai nei.
Momoli la agaga faafetai ole susuga ia Pati Junior i lana faiaoga ia Mal Ainuu faapea le faletua ia Raylyne Ainuu ona ole tutu malosi e faamalosia ana koleniga ina ia taulau o lona faamoemoe ile masina fou o Iulai.
