E ui ina motu mai ma le taula tamafanau o le afioaga o Lepea, ae sa maitauina lava le lotonuu, loto aiga ma le loto i le galuega a le Atua. Auā o le faasinomaga ma le siosiomaga o le tagata na foai mai e le Alii.
I le feagai ai o le Ekalesia Katoliko Sagata Telesia Iesu Tamameamea i Lepea i le latou sailiga seleni i le Aso Toonai ua mavae, 7 o Novema i le St John The Evangelist Primary School, na molimauina ai le toatele o tamafanau a lenei afioaga o loo auamau i Aotearoa, aemaise o paolo ma gafa e malu ai lenei nuu, uo ma ē masani sa auai e tuu atu lo latou tau‘au e fesoasoani ai i le sailiga seleni auā le faaauauina o le galuega e ala i le mauga o le Atua.
E to‘a 15 sui o le aulotu na malaga mai auā lenei faamoemoe faatasi ai ma matafale e 15 o loo faatinoina le mafutaga i Aukilani sa faataunuuina lenei sailiga seleni.
O le afioga ia Patele Felise Lemi na taitaia le polokalame i le sauniga lotu ona saunoa lea o le afioga ia Tuimavave Pio Mulipola o le sui o le mafutaga e faafeiloai Samoa potopoto ma tatala aloaia ai le faamoemoe.
Na amata i ipu a aiga o le mafutaga ona faagasolo ai lea i ipu a le aumalaga mai Samoa faapea ipu aualofa e tauala atu i sui o le mafutaga a Lepea i Aukilani ma sui o le aumalaga, ae lē gata i lea o lupe faalele a le afioaga ma le Ekalesia sa fai foi lo latou sao auā le mauga o le Atua. E maeu le lotonuu ma le loto aiga i tamafanau a le afioaga e ala i le limalima foai ma le alofa tulai sa faaalia i lea aso. Na sosoo ma le taumafataga na saunia e aiga o le mafutaga i Aukilani, ma tolaulauina ai loa le maau ma le lima foai a alo ma fanau o le Ekalesia ma le afioaga.
E $68,500 le seleni na tauaaoina e le mafutaga ma le aumalaga mai Samoa, ma o le agaga faafetai na saunoa i ai le fetalaiga ia Lepou Petelo II o le sui o le aumalaga mai Samoa, sa tu tootoo i le aso, e faafetai ai le agalelei o tamafanau o le Ekalesia i Lepea ma le afioaga, aemaise o uo ma ē masani ona o le laofa tulai ua tauaaoina.
Ma faaiu ai loa i faaaloaloga e pei ona masani ai Samoa i aso faapenei.
