O le aiga fiafia, o le aiga ua Atua i le Alii. O le sini autu lea o le mafutaga tuufaatasi a le aiga Asotoelau, lea sa faataunuuina i le Aso Toonai ua mavae 18 o Oketopa i le malumalu o le PIC i Glen Eden.
O tama fanau o loo alala ma papao i Ueligitone o suli o le aiga o loo aumau i Aukilani sa faapea ona faatasi uma i lenei lotu faamanatu.
O le manulauti o lenei faamoemoe e pei ona faatinoina i tausaga uma o le faamasani lea ma le mafuta faatasi o matua ma fanau, ae le gata i lea o le naunau ia uluola le aiga ma maua ni tagata mo le galuega a le Atua.
O le susuga i le faafeagaiga ia Rev Faapaia Seumanutafa sa taitaia le sauniga, ao le lagiina o viiga o le Atua na peseina lava e le aiga potopoto faatasi ai ma talosaga na faaleoina lava e nisi o tina ma tama o le mafutaga.
O faaevagelia na saunia e auaiga o loo alala i le itu i Sisifo ma le itu Saute o Aukilani faatasi ai ma le sao o i latou na malaga mai i Ueligitone. O le gafa o le aiga na saunoa i ai Rev Apa Lealiifanolevalevale.
O le tumutumuga o lenei sauniga o upu na faalaeiau ai le taitai ia Rev Faapaia e faapea- “Amuia le nuu ua Atua i le Alii, o le nuu ua filifilia e ia e fai mona lava tofi.” O se faamalosi na toe faamanatu ai i le aiga, o le aiga o le nuu na filifilia e le Atua.
O le afioga ia Foloimalo Fa’au’uga o le taitaifono lea o le mafutaga sa saunoa i le faagasoloina o le polokalame ina ua maea le sauniga. Na sosoo ma le taumafataga na tapenaina lava e aiga taitasi ma faatino ai nisi o faafiafiaga ma tala ai loa ma le filialii.
Ua lua ai nei o tausaga talu ona amata mai lenei lotu faamanatu, ae o le faavaeina lava o lenei mafutaga, ua leva ona amata mai e matua i totonu o Samoa.
E tasi le faletama o loo latou faaauauina pea lenei lotu faamanatu i tausaga taitasi, o i latou sa tupuga mai ia Lealiifano Tapale 1.
O le toatele o tama fanau a lenei aiga ua avea ma ositaulaga i totonu o nisi o Ekalesia, e pei ona iai le EFKS e 17 lupe faalele, 1 le Metotisi ma le tamaitai e 1 o lo galue nei faataupousa I Roma.
