Na amata faavae le lotu a le aiga i Samoa i le 1908, ma ua 102 nei tausaga o faamanatu pea e le aiga
E iloa le fealofani ma le nofo lelei i totonu o se aiga ona o le maopoopo ma mafuta faatasi.
O nei aso ua tele tupulaga ua soifua ma ola a‘e i atunuu i fafo, o le puipuiga lava i le tele o faafitauli e pei o le toe fenofoa‘i o fanau ona o le lē malamalama i le talaina o gafa, aemaise le toe femisaa‘i, o itu nei o le silasila toto‘a o mātua, ma o se ‘auga tonu foi lea e mafua ai ona tuufaatasia nisi o aiga potopoto i nei sauniga faaleaiga.
O se uluai fatu sa totōina mai e tuaa i aso ua mavae i totonu o se aiga, auā e mavae atu lea tupulaga ma lea tupulaga ae olaola pea i loto ma agaga, e fai foi o se lotu tuufaasolo.
Ua savalia nei le valu o tausaga talu ona tuufaatasia aiga uma a Sa Si‘a mai Malie i totonu lava o Brisbane i se latou sauniga faamanatu.
Na amata faatūina mai lenei sauniga i Samoa i le tausaga e 1908 ma ua 102 nei tausaga o faamanatu pea e le aiga.
O le tausaga e 2003, na malaga mai ai Si‘a Manoo kako, o le sa‘o lea o le aiga i le taimi nei faapea Si‘a Sione Matea e tatalaina le lotu i Brisbane nei, o le taimi lea o soifua le toe ulutaia o le aiga, le tinā matua ia Vaitupu Timoteo.
E ui o le tele o le aiga e auai i le EKFS i Samoa peitai, o Brisbane lava na faasolo mai le taitaiga o sauniga lotu i na taimi e le tausi matagaluega Ekalesia Metotisi a Logan City, le susuga ia Rev Soti Soti.
Na toe faaauau mai e le afioga i le Sea ia Rev Setu Faaniniva, lea ua penisione malolo i le taimi nei.
O le Aso Toonai, aso 22 o Ianuari sa taitaia ai le sauniga o lenei tausaga e le tausi matagaluega Ekalesia Metotisi a Logan City, le susuga ia Rev Ioane Tuupō mai le Alataua.
O le talaaga o le lotu a le aiga na fofogaina lea e le afioga i le aloalii, Galumalemana Naea Tagaloa Timoteo, o se tasi foi o tamalii faipisinisi lauiloa i Brisbane i containers ma faamomoli, ma laei lolomiina faapea faleoloa o laei Samoa.
Ua tupu ma ola tupulaga fai a‘e a le aiga e vaaia lea i le faitau aofai o le numera siisii i lea tausaga ma lea tausaga.
E ui i se tupu ma le ola o le aiga i le taimi nei peitai ua lē atoa le faitau i le taimi nei ona o le toesea i le maliu ma le oti o le toe ulutaia, le tina matua ia Vaitupu Timoteo faapea le afioga ia Aogamalie Ma‘ilata, ua toalua ai le fuainumera ua misi talu mai le tausaga ua mavae.
O le taimi nei, o le afioga ia Galumalemana Naea Tagaloa Timoteo, Mauala‘ivao Tusitala Timoteo, Tama Auimatagi ma Leu Liu, o i latou o loo vaaia le aiga i Brisbane nei.
E mamalu lava nei faatasiga ona o le faamalumaluga a faafeagaiga tau lagi, poo lupe faalele a le aiga e pei o le tausi matagaluega, susuga ia Rev Lafaitele ma Keli Mika, Kueva ma Selesa Tuimauga faapea Collin ma Veve Campbell.
Sa faaiuina i se taumafataga sa saunia e le aiga potopoto ma luluaao ai ma faatofa.
