“Lo‘u agaga e ia faamanu atu i le Atua, o mea uma foi o i totonu ia te a‘u ia matua faamanu atu i lona Suafa Paia.”
O upu ia o le pese a Tavita na ia faafetaia ai le alofa tunoa o le Atua a o le faamaumauga o le talaaga mai i le amataga o le faavaeina ai o le aulotu lenei a Weymouth, na fofogaina e le susuga i le faafeagaiga, Susuga Rev. Silo‘a Lologa Iosua e faapea, “Auā o le faamoemoe ua taunuu o le laau o le soafua lea”.
O le saunoaga lea a le susuga i le faafeagaiga na tausia le aulotu a Papakura i ia tausaga Susuga Rev. Finau Lokeni ma lona faletua o Tagiilima Lokeni. Ona faalauteleina lea ma faamautuina ia fuaitau e faailoa ai le agaga faafetai tele i le Atua e le saunoaga a le susuga Rev. Silo‘a Lologa Iosua o le faafeagaiga taulagi lea o loo feagai nei ma le tausiga o le aulotu e faapea, “O lenei aso, ua na o le agaga faafetai lava ma le loto vivii i le Atua ona o lenei ua aulia manuia mai le 35 tausaga, talu ona faavaeina mai le aulotu i le aai nei o Weymouth.”
O le tausaga e 1979 na faavaeina ai le aulotu ma faagasolo mai pea fuafuaga seia oo lava faamautu ina ua tupu olaola ma faamanuiaina ai pea lava le atinaeina o le galuega.
O le leo lava o le agaga vivii ma le loto o le faafetai tele i le Atua ona o lona alofa tunoa ma lana taitaiga mai lava i le faavaeina o lenei mafutaga lotu seia oo mai ina ua faamanatuina ai le 35 tausaga o le folauga a le Ekalesia EFKS i Weymouth.
O le susuga lava i le Faafeagaiga ia Rev. Silo‘a Lologa Iosua na taitaiina le sauniga lotu faamanatu i le Aso Sa. O le loimata maligi o le fiafia ma le lagona faagaeetia na maitauina auā o nisi o sui paeonia mai le amataga na talatalaina ma faaleoina le asaga ma le folauga na feagai ma lo latou vaitau a o lea ua mautu ma ua tele faamanuiaga mo le Ekalesia e pei ona ua iai nei.
I le sauniga o le lotu faamanatu na mafai ona auai mai i ai nisi o sui mai le amataga ona o le fia auai ma molimauina le faatāuaina o lenei aso tāua.
Sa tuu avanoa foi le taitai o le sauniga mo ni sui na saunoa e aumai ni tala o le galuega ma sa tele se silafia o tagata lolotu ua iai nei ina ua maua lenei avanoa faaauro na mafai ai ona faafofoga i le asa maiga o le glauega seia oo mai i le taimi nei.
O lea la ua mautu uma vaega o le galuega mo le Atua auā o le masina o Iulai o le tausaga nei lava lea na faamae‘aina ai le aitalafu o le galuega ma ua soifua ma galulue fiafia nei tagata lolotu uma ma matafale taitasi o le aulotu faatasi ai ma lo latou faafeagaiga tumau le Susuga Rev. Silo‘a Lologa Iosua ma lona faletua ia Lotofoa Lologa Iosua.
Tele faamanuiaga ma alofaaga na fofogaina mai sui o le aulotu o loo alala ma papaaao i vaega eseese uma o le lalgolagi, ia i latou ua lē mafai ona auai mai ae o loo manatua lenei aso tāua. Talaaga o le galuega atoa o le a mafai ona maua i le Sulu a le Ekalesia mo lou fia silafia atili i le faavaeina mai o le galuega ma le aulotu a Weymouth.
