A iai Iesu i se aiga o se aiga fiafia, e mauaa ma mausali, o ā fita ma faigata e lē mafai ai ona maluelue le faitotoa auā ua faavae mea uma i le Atua.
O le sini autu lea ma le famoemoe na iai le taeao o le Aso Toonai ua mavae, 13 o Tesema i le malumalu o le Ekalesia Katoliko i Papatoetoe le Holy Cross na faamantuina ai le lotu faamanatu a le aiga Sa Matafeo i Leauvaa e pei ona faatinoina i tausaga taitasi.
Ua 4 ai nei o tausaga ona osia lenei taulaga faafetai i le Atua e sulaina ai le alofa ma le agalelei o le matai i le lagi ona ua faaiuina ma le manuia galuega sa feagai ai ma le aiga i lenei tausaga ae lē gata i lea o le talosiaina o le savaliga mo le tausaga fou. Faatasi ai ma le patipatia o le tofia o le afioga ia Matafeo Tevaga Taputu Alefosio Lui Talevu e fai ma taitai o le aiga i le lumanai, fapea le filifilia ai e fai ma Sa‘o o le aiga Sa Matafeo i Leuvaa.
O lea sauniga Paia na auai mai ai le afioga ia Tuala Asa ma le aumalaga mai Ueligitone faapea lupe faalele ma sui uma o le aiga o loo alala ma papao i Aukilani. Ua taunuu ai foi le muagagana a le atunuu o lupe sa vao eseese a ua fuifui faatasi ona o le alofa o le Atua.
O le taitai o le sauniga o le misasa Paia o le afioga ia Patele Iosefa, ae o le folafolaina o le afioga a le Atua na mānavaina lea e le lupe faalele a le afioaga le afioga ia Patele Talipope Tuala.
O le mitamitaga foi i le aiga ma le siitia maualuga o le afioaga ona o le faaeaina foi o le tautua a lenei alo o le aiga i se tulaga maualuga i totonu o le galuega a le Atua, lea ua tofia ai e avea ma pule o le au Misionare o le Faatuatua.
O viiga o le Atua na lagiina lava e alo ma fanau o le aiga Sa Matafeo i Niu Sila nei i lalo o le taitaiga a le susuga i le faipese ia Tamausu Faalepo Vaotuua ae o le tatalo na faaleoina lava e le fanau.
O le siui o lenei faamoemoe na avea ai le afioga ia Malagamalii Alefosio Nonumalo e fai ma fofoga o le aso, ae o le afioga i le taitaifono ia Muliagatele Asalemo na saunoa faafetai i le paia o le aiga i galuega faatino o lenei tausaga.
Na saunia foi faafiafiaga e nisi o le fanau a o fai le taumafataga, ma faaiu ai loa i le saunoaga ma le faamanuiaga a le Sa‘o o le aiga le afioga ia Matafeo Tevaga, faatasi ai ma le leo faaopoopo a le lupe faalele o le afioaga le afioga ia Patele Talipope Tuala ma faaiu ai loa i le pese Lota Nuu.
