O le tele lava o Ekalesia Samoa i totonu o le aai o Melepone, na faamanatu faatasi le Lotu Tamaiti ma Samoa e pei ona sa masani mai ai, e ui ina eseese faiga ma tapuaiga, ae o le silisili i faamoemoe o le faatāuaina lea o le aso ua faapitoa mo alo ma fanau.
E ui ina iai nai eseesega ona o Samoa e lavalava fou ma seevae fou toe tua i le aso malolo ma o le atunuu atoa o loo faatāuaina ai, ae o le tulaga i taumafa, ia e tutusa lelei lava le tāua ma le tele o le tulaga lea i Samoa ma nei atunuu ua nopiai ai.
O nisi foi o le aufaigaluega paia o loo galulue i ekalesia papalagi, o loo o latou faatāuaina pea aso faapitoa tāua ma aogā nei o loo faatāuaina i Samoa, e faailoa atu ai Samoa i isi atunuu eseese o loo aofia ia latou ekalesia.
O nisi foi o le mamalu o le atunuu e lotu papalagi, ae oo i aso faamanatu faapitoa nei ona agai lea i sauniga a ekalesia Samoa e toe faamanatu ai soifuaga na ola a‘e ai, aemaise o le faailoa ia latou fanau.
Ae alo maia lau silamaimoa o nisi nei o ekalsia eseese i le aai o Melepone na mafai ona faailoa mai a latou Lotu Tamaiti o lenei tausaga, 2014.
