Lomiga faapitoa mo David Tua

O le faasauni atu o le susuga David Tua i lana fusuaga o loo loma nei i le Aso 3 o Oketopa, ose tasi lea o tulimatai e le taumate o loo silasila ma taulai iai le naunau a si o tatou atunuu. E le taumatea foi le tulaga lelei o le a toe siitia iai le tautua ma le taleni fusu a lenei alo lauiloa o Samoa pe afai ae faamanuiaina lana taumafaiga o le a faasauni atu iai.
Afai o e silasila i faatalanoaga i luga o televise i le va o David Tua ma le alii o Cameron lea o le a o la fusu nei, ona lagona lea o le faanoanoa ona o saunoaga tuulafoai a lenei alii papalagi. Ae lagona lava le agaga faafetai ona ole tofa o loo faatoatoa ai e le susuga David Tua le va o ia ma le alii o le a o la fusu, aemaise o le aufaasalalau.
Ua manatu ai le Pulega ma le aufaigaluega a le Samoa Times, o le a lomia lana lomiga faapitoa i le vaiaso o loo loma nei, 28/09/2009 ma o le a faapitoa lava lea mo le susuga David Tua ma lona faamoemoe. Samoa e, o faiva tapuaia o faiva ia e manuia.
O le mea lea, ole a avanoa le Samoa Times e faasalalau ai sau faamanuiaga. Tusi mai lou suafa ma lou afioaga ma aumai lau faamanuiaga, ona o matou lomia lea ma faasalalau i luga o le auaunaga le faatuaoia a le Samoa Times. O le a faapea foi ona tuuina atu se kopi faapitoa o le lomiga lenei i le aao o David Tua ao faasauni atu i lana fusuaga, e faailoa ai le tatou lagolago faatasi ao alo atu i lana taua faitoatasi.
Aua nei e misia lenei avanoa ua ofoina atu e le Samoa Times e faalauiloa ai lau faamanuiaga mo David Tua, ua lauiloa ai Samoa i le lalolagi atoa.