E toalima ni taitai teine ma faafafine o le vasega faaiu a le Kolisi o Avele ua faasala e le aoga ona o le faaoolima i se tasi o teine o lea lava aoga.
Faatoa mae‘a atu foi se mataupu ua suesueina nei e le ofisa o Leoleo i se tama o le Vasega 9 a le aoga lea na faaolima foi i ai se isi tama o le vasega faaiu. A o lea foi ua toe aliae mai le isi faaoogalima i le aoga lava lea.
O teine aoga ma faafafine o i latou ia na tuuaia i le faaoolima i le teine aoga ma na lipoti e le tamaitai aoga lenei i faiaoga le faaoogalima ma faasala ai loa tamaitai aoga.
O le faasalaga o le aveese o tofiga taitai ma ua suesue foi e le Matagaluega o Leoleo lea mataupu. Ona pau le isi faamatalaga na maua e le tatou nusipepa o le itu lea e faapea, na loka e nei taitai teine ma faafafine le fale lē ta‘ua ae fasi ai iina le teine aoga ona o le “le usitai” i faatonuga a taitai.
Ua faaopoopo ai foi nei faafitauli i le mataupu muamua lea na matuā aafia ai le aoga ona o le tama aoga lea na fasi, ave i le falemai ma iloa ai le tele o le aafiaga o lona fatafata, ua leaga le isi ona mata ma na faatonuina le taofia i le fale mo le masina atoa ona o le tau faafoi o lona malosi.
O le faamatalaga a le tama aoga lea, na tu‘i ona foliga ma solomuli i tua ae fetaui ma le sau o se van sa aumai ai se pasese o tamaiti Avele lava ma taia ai o ia. E le‘i ta‘ua e Avele Lloyd Malietoa i ona mātua le fasiga o ia ae na iloa ina ua lē ‘ai ma amata ona vaaia le puai toto o lea alii.
O le fa‘ata na iloa ai ua leaga uma le fatafata ua fulafula ma ua faafaigata ona mānava ma na iloa ai foi le leaga o le mata taumatau o lea alii.
Ua fiu faiaoga e faamasino e leai lava se isi o ta‘ua le mea na tupu. O lea foi na tu‘i e se isi tama o le vasega faaiu le ulu o se isi tamaititi Tausaga 9 i le lotoā lava a le aoga ma o le faaoogalima lea na tu‘i le ulu o le tamaitiiti aoga lea ma matapogia ai.
E matautia faiga o loo vaaia e lē gata ia Avele ae faapea foi isi kolisi o loo maua mai ai lava lipoti i le faaoolima o isi tamaiti aoga i isi tamaiti aoga.
O le taumafaiga a nisi o aoga ina ia mafai e fanau laiti ia e aafia ona ta‘u vave mataupu nei auā e iai uiga ia e molimauina e faafefe tamaiti laiti ina ia aua ne‘i ta‘ua faaoogalima e faia faasaga ia i latou.
E oo lava i le taimi lenei ua toatele nisi o le aoga ua faia faamatalaga faasaga ia Avele i le faitala. Ua lē fiafia ona o le ta‘uleaga ai o le aoga peitai na faamalosi lava Avele e fai ana suega mulimuli o le tausaga ona o lea na vavao e le falemai se‘i malosi lelei.
O lea lava la na alu Avele i le vaiaso atu i ona tua e faatino lea vaega o lana aoga ma ua fautuaina e ona mātua e mafai ona alu ese ma Avele i lenei tausaga ae na ia ta‘ua e leai o le a faaauau pea i le Kolisi ona o lona lava naunau e mae‘a i Avele lona ola aoaoina.
Ua faaauau ona tetee e le alii o le Vasega 13 e suafa ia “Sene” le tuuaiga muamua o lona fai o le faaoogalima e pei ona tuuaia ai e le alii o Avele ae ua tuu atu nei i leoleo nei tuuaiga ina ia saili ai le mea tonu na tupu na semanu e uma ai lava le ola o lea tama aoga laitiiti.
