Loimata o lagona ootia i fanau ua sauaina

O o latou siufofoga mālie ona o le taleni ma le tomai tau musika, ua fai ma fesoasoani i mafatiaga o fanau e 65 o loo tausia i le nofoaga o le House of Hope o loo faagaioia e le Toomaga mo ē Puapuagatia, le Samoa Victim Support Group.

O le au mau tulaga i le tauvaga pese o le Samoan Idol a le leitio faasalalau o le siufofoga o le manamea Samoa i Sini, na latou afea le nofoaga i le Aso Faraile ua mavae ona o le fia asiasi i ai ma fia silasila foi i fanau a le atunuu ua sulufai i lea nofoaga ona o mafatiaga i sauāga o le tino, le mafaufau, ma le agaga ona o faiga solitulafono ua faia i ai e nisi, aemaise foi o nisi fanau o o latou lava mātua ua mafua ai.

O le pese a fanau e faafeiloai ai le aumalaga na vaaia ai le maligi o loimata o nisi o tina o le aumalaga, ona o le vaavaai atu i nisi o fanau e iai manaoga faapitoa e pipili e lē mafai ona savavali o loo tausia e le Toomaga mo ē puapuagatia.

Atonu o le lagona lava lea mo tatou uma pe a molimauina ni vaaiga faamomoi loto faapea, auā o tatou o tagata Samoa e tatou te auau uma i fanau. Peitai a sauaina loa ma aafia o latou olaga mu‘amu‘a i ni faiga solitulafono a nisi tagata ona lē manuia lea ma o se faiga e tatou te lē mananao e tupu ia tatou foi fanau.

Pe atonu o lagona foi ia o nisi o tina ma le aumalaga ina ua faatoa silasila i ia fanau a le atunuu, auā o lo latou avanoa faaauro a o iai i Samoa mo le auai i faafiafiaga o le Teuila ua mae‘a ae ua avanoa ai ma lea asiasiga faapitoa.

Na faaalia e le faletua o Lina Chang o le pelesetene foi o le Toomaga mo ē Puapuagatia, o avanoa faapea e sili ona tāua ia te ia ma sui o le faalapotopotoga e maua ai e fanau o loo latou tausia ma vaaia le avanoa e feiloai atu ai i nisi tagata e ese mai i o latou aiga o loo asiasi atu. “E faatupu ai o latou lagona fiafia ma faagalo ai mafatiaga loloto i o latou lagona faatamaiti ona o sauaga ua aafia ai”.

O se tasi o le aumalaga le tofa Seumanu na ia faailoa lona faateia ina ua faatoa oo i le nofoaga ona sa faapea a ia, e lē toatele ni fanauiti a le atunuu ua sauaina ua tausia ai. “Matuā faateia lava a‘u ina ua ou vaai i nai fanau, talofa e..ou te ofo a‘u i nei tagata ma le lē alolofa”.
O le malaga mai o le aumalaga o i latou na manumalo i le Samoan Idol e aofia ai se tamaitai laititi e iva tausaga le matua, sa faafiafia ai i polokalame o le Teuila lea sa pepese i le polokalame o le Best of Samoa, lea sa faafiafia ai foi nisi lauiloa o Samoa i Niu Sila i televise o Pani and Pani, faapea le Laughing Samoans.

O le afioga Sulusulumaivasa Ivan ma lana leitio faasalalau sa lagolagoina lea tauvaga pese ma tapenaina foi le malaga i Samoa e auai i polokalame ma faafiafiaga o le Teuila 2014.
Le aumalaga o i latou na manumalo i le tauvaga pese o le Samoan Idol i Sini Ausetalia a o faafiafia mo fanau e 65 ua sauāina, o loo nonofo ma tausia i le nofoaga mo ē puapuagatia a le faalapotopotoga o le Toomaga i Tuanaimato