Logo i tino taumafa lelei a le Lady Faith

O se faamoemoe ua taunuu, o lagona o le faaeaina ma le agaga faagaeetia, aemaise pe afai o se faatatauga ua loa ona tapena mai, o nisi ia o faalogona na matuā faamalieina ai finagalo o le pulega ma le auaunaga fou ua amatalia nei a le faleaiga o le ‘Lady Faith Pacific Fastfood’ i le 257C East Tamaki Rd, Otara.
O le vaiaso na tea nei sa tatalaina ai lenei tautua. O se moemitiga sa lei faigofie lona tapenaina aemaise lava i le tulaga tau laisene ma pemita mo le gaseseina o taumafataga aemaise nisi o aiaiga faapisinisi e tatau ona faamalieina a o lei tatalaina le auaunaga.
Ae peitai, e ui i nei fitaituga ae sa matuā fofo‘e ese atu ina ua tino mai ma tau lau o le faamoemoe. Ina ua fesiligia le pulega o le ‘Lady Faith’ i le mafuaaga ua a‘e ai se tofā i lenei ituaiga auaunaga, ae ua faaalia mai o se tulaga ua loa ona latou faatinoina pe a iai ni ‘oka e faato‘ai atu, aemaise lava i le gaosia ma le kukaina o le kekepuaa ma le kekemamoe, se tasi o matai‘ai a le toatele o le mamalu o si o tatou atunuu.
Mai lava i lea taimi sa faia ai loa sa latou faatatauga ina ia faalautele le tautua mo le kukaina e lē gata o taumafataga māmā e pei o le panikeke, suafai, kokoaraisa, kokoesi ma faaausi, ae ua faalautele le tautua i le tapenaga o soo se ituaiga taumafa felanulanuai ma le tofo lelei mo le faamalosi tino ma vai‘aiga o le aoauli.
Ua lē na o le gaseseina ma tulaga tau catering mo taumafataga ua faapitoa i ai le tautua a le ‘Lady Faith’. O loo faataoto foi tapenaga mo le faatinoina o le latou auaunaga lafotupe mo Samoa faapea le tusiaina ma le mamanuina o ata.
O loo tatalaina foi lo latou faleaiga i aso uma o le vaiaso mai le 6 i le taeao. O lenei foi tautua o loo faafoeina e le susuga ia Levao Tima ma le faletua ia La Fenika faapea le susuga ia Laki Laufale ma le faletua ia Rita aemaise ai foi o tauaiga ma le aufaigaluega laufofoga fiafia a le ‘Lady Faith Pacific Fastfood’.