Lipoti mai i le Matagaluega o Aoga

Vaaia pea tamaiti faatau oloa i le taulaga

O se tasi lenei o mataupu e fesiligia soo ai le Matagaluega o Leoleo i le tulaga o le faamalosia o le tulafono e molia ai mātua ona o loo vaaia pea i le taimi nei tamaiti e savavali solo i totonu o le taulaga e faatau oloa.

Sa faaalia mai ai e le Sui Sooupu o le Matagaluega o Leoleo, Leaupepe Fatu Pula o le latou galuega faifaatasi ma le Ofisa o Aoga ma e faatolu ona lapatai i mātua o tamaiti e ripotia atu ona faato‘ā molia loa lea.

Peitai, na faaalia e le tamaitai o Maimoana Petaia, sui o le Matagaluega o Aoga e faapea, o loo matauina e le ofisa vaavaaia lea tulaga aemaise lava i itula e tatau ai ona iai le tamaititi i totonu o le potu aoga.

O le ofisa vaavaaia, e aofia ai le Matagaluega o Aoga, pulenuu o afioaga taitasi, komiti o aoga, Matagaluega o tina ma tamaitai aganuu ma agafesootai, Matagaluega o Leoleo faatasi ai ma le ofisa o le Loia sili.

“O loo faatino ma fai le galuega a le Matagaluega o aoga faapea le ofisa vaavaaia, ae peitai o loo vaaia pea tamaiti o loo faatino lea tulaga ma e iai le avanoa e ripoti mai ai e soo se tasi tamaiti ia i le Matagaluega o Aoga ona suesue lea ma taumafai se auala ina ia ave i se aoga e faaaooga ai,” o se faamatalaga lea a Petaia.

Na ia ta‘ua foi, e iai le popolega o le Matagaluega i le ave o tamaiti e maua i le ofisa o Leoleo ma o lea e ala ai ona ripoti sa‘o atu ai ma avatu i le ofisa o aoga ona suesue lea ma aami mātua e faatalatalanoa i lea tulaga.

O le faagasologa lava ia o le polokalame o le SSFGS o loo faatautaia e konesale e toaono mo itumalo uma i totonu o le atunuu, e silia ma le 150 tamaiti ua faamauina faato‘ā ulufale i aoga mo le taimi muamua.

O se itu tāua lea i le Matagaluega o Aoga, ona ua matauina o loo aoga le polokalame ma le tulafono mo le faamalosia o le fanau i le va o le lima i le 14 tausaga ona o i le aoga.

 

$4 miliona faatupe ai aoga a le fanau laiti

O se tinoitupe lea o loo faagaioi ai le polokalame o pili aoga ma meatotino e manaomia mo le fanau i aoga laiti (Samoa School Fee Grant Scheme – SSFGS) i le tausaga.

O le 70% pasene o lea vaega tupe o loo fesoasoani mai ai Ausetalia ma Niu Sila a o le isi vaega o loo aga‘i sa‘o mai i lo tatou malo,” o se saunoaga lea a le tamaitai pule lagolago o le vaega o loo nafa ma le faagasologa o ia polokalame i le Matagaluega o Aoga, Maimoana Petaia.

O lea seleni, e $100 tala mo le piliaoga o le tamaitiiti e toatasi mo aoga laiti uma se‘i vaganā ai tamaiti o loo aooga i aoga faapitoa (manaoga faapitoa) e $200 tala mo le tamaititi e toatasi.

E aofia ai i fuafuaga mo le faasoaina o le $4 miliona tala lea le faatupeina o meatotino e manaomia e siitia ai lo latou ola a‘oa‘oina ma ua malamalama puleaoga ma komiti i lea tulaga i mea e mafai ona faaalu i ai lea seleni faapea foi ma meatotino e lē faatagaina.

E iai nisi o aoga na ta‘ua e le tamaitai pule lagolago, sa faia lea tulaga ma o tupe e faaaogā faapea, e toe faatumu e le aoga auā ua tofu lava le aoga ma le tusitupe o lea polokalame.

O se tasi foi o aoga ua lē mafai ona faailoa mai e le Matagaluega, sa latou faatau se pusa‘aisa, ma o itu ia e lē o aofia i lalo o lea polokalame se‘i vaganā ai le fesoasoani e mafai ona ave mo le totogiina o pili o le vai faatasi ai ma le eletise.

O tamaiti mai le lima tausaga agai le 14 tausaga lea o loo aofia i lalo o lea faamoemoe ma e mo na o aoga laiti o loo aga‘i sa‘o iai lea fesoasoani. Talu ai ona sa fesiligia e nisi o mātua le tulaga o fanau e vave mae‘a aoaoga i aoga tulaga lua ma agai atu i aoga maualuluga ae e lei atoa le 14 o tausaga, o lea ua faamanino mai e le Matagaluega, e lē toe aofia i lalo o le polokalame ona e na o aoga laiti o loo aga‘i sa‘o i ai le fesoasoani.

E lima tausaga le umi o le polokalame o le SSFGS lea o loo faagasolo e konesale (consultants) e toaono ma e 160 aoga o loo aofia ai, o aoga e 140 a le Malo, 15 aoga mai Ekalesia ma aoga faapitoa poo private schools e lima.

O le mae‘a o le lima tausaga o loo fesoasoani mai ai Ausetalia ma Niu Sila, o le a faatupe ai loa e Samoa lava ia lea polokalame.

 

E lē toe PSSC ae SSSC i le 2013

Talu ai ona o le tausaga fou lea o le a amata ai ona faatino uma e Samoa taiala o le suega mo le Tusipasi o Aoga Tulagalua a le Pasefika – Pacific Senior Secondary Certificate – PSSC, le suega mo le fanau i le vasega 13, o le a sui ai foi ma le igoa mo lea suega.

O le a Samoa Senior Secondary Certificate, Tusipasi mo Aoga Maualuluga i Samoa – ma e lē toe pei o le faiga na sau ai e fai uma mai i Fiti pepa suega ma le togiina o mataupu pe a mae‘a le suega faatasi ai ma internal assessments poo sailiiliga a le fanau e faaauau i aoaoga o le tausaga atoa.

O le a faatino uma i Samoa lea tulaga i le tausaga fou ma e talitonu le Matagaluega o Aoga, ua iai sui o le atunuu ua agavaa mo le tuufaatasia o pepa suega mo lea suega. E tolu mataupu sa sauni uma lava i Samoa i le tausaga na tea nei ma o le a faaauau ona faatautaia i Samoa lava ia i lenei foi tausaga – o mataupu ia e aofia ai le Gagana Samoa, Musika ma le Soifua Maloloina.

O le tausaga e 2006 na ioe ai faauluuluga o aoga i le Pasefika e tatau ai ona faafoe e le atunuu le latou suega ma o le tausaga e 2010 na faalauiloa ai loa faiga faavae a Samoa lava ia mo le tapenaga o lea suega. O le tulaga i le totogiina o pili o lea suega, o le a alu i lona tau  masani, e pei ona faatino ai le PSSC lea e $55 tala Samoa i le mataupu e tasi, e ese mai ai le resitala e $55 tala foi.

O le a faamalosia foi e le Matagaluega le totogiina mai o pili o tamaiti uma i le taimi faatulagaina ma e lē toe talia se talosaga mo le tuai ona totogi atu o pili o le SSSC pe a amata i le tausaga fou ona e lē toe manaomia le amata o suega ae toe vevesi i lea tulaga ae o loo tuu mai le tausaga atoa e totogi ai ia pili.