Lipoti e faasalalau ma le faasaoina o soifua mai le pule i le ola

O se tagata ua aafia i ni mafatiaga e na te moomia se fesoasoani
O se tagata ua aafia i ni mafatiaga e na te moomia se fesoasoani

O le tausaga e 2017 na pasia ai le tulafono fou a Samoa e faasino i le galuega a le faamasinoga e sailiili ai mafuaaga moni o le maliu o se tagata e masalomia na mafua i ni manu’aga na ia faatupu poo self inflicted wounds, lea e mafai foi ona ta’ua o se maliu e masalomia ai le pule i le soifua.

O le Aso Faraile ua mavae na faia ai se semina na auai faamasino o le faamasinoga, faatasi ai ma leoleo ma le vasega o tusitala o nusipepa, televise, ma leitio. Sa faamanino ai aiaiga o lea tulafono ma faamalamalama ai foi taiala o lea tulafono o loo lima taitaiina ai le lipotia e le aufaasalalau o se mataupu e faasino i se maliu e masalomia ai le pule i le soifua.

O se alii faamasino mai Niu Sila o lana galuega e patino tonu i suesuega o maliu e masalomia le mafuaaga na ia faailoa ai le vaega 33 o le tulafono a Samoa e ta’ua o le Coroners Act 2017, o loo aiaia e le tatau ona faasalalauina faamatalaga uma e faasino i se maliu e masalomia ai le pule i le ola.

O le taua o lea aiaiga ona o loo faamamafa ai le taua o le puipuia o tagata e maua i ni mafatiaga mamafa o le olaga ona o ni faafitauli ogaoga e ono faia ai se filifiliga i le faauma o lona ola.

O le taua o lea aiaiga o le tulafono o le galulue ai o tagata faasalalau, leoleo ma le faamasinoga i le taofia o le pule i le ola ma faasao ai se soifua e ono maumau atu ai.

O le tele o mataupu faapea o loo lipotia mai e leoleo o loo faamatala atoa ai ma le auala na maliu ai se tagata peitai o se tulaga lea ua tatau ona silasila totoa iai leoleo.

O le tele o mataupu tau pule i le ola e lē o silafia e tusitala le aiaiga o lea tulafono. Faaalia e le afioga i le Faamasino sili, Patu Tiavaasue Falefatu Sapolu, ina ua ia tapunia le semina o se mataupu taua tele le malamalama o tagata uma o aafia i le suesueina o se mafuaaga tonu o se maliu, o leoleo ma le aufaasalalau io latou tiute tauave ina ia mafai ona fesoasoani i le faasaoina o se soifua e ono fano i lea tulaga.

O le taiala o galuega faatusitala i Samoa ua matua maioio ai le auala e lipotia ai se mataupu tau pule i le soifua, ma ua taofia ai foi ma le faailoa o le auala na aafia ai se soifua. Na toe afea i le semina le mataupu na faasalalau ai le ata o se tagata na aafia le ola i lea tulaga lea na faasalalau e se nusipepa i Samoa.

O se isi foi lipoti i le vaiaso ua mavae sa lipotia ai ni tagata se toatolu e aofia ai se tamaititi 14 tausaga le matua o loo masalomia i le pule io latou ola.

E oo mai i le taimi nei e lei maua le faaiuga o suesuega a leoleo ma le faamasinoga e faamautu ai mafuaaga o ia maliu e tolu.