Ua mae’a taumafaiga a le Samoa 7s mo lenei tausaga 2017/18 i taamilosaga a le HSBC World Sevens i se tulaga faaletonu i Paris, na faiaina uma ta’aloga e lima a Samoa. Na maua ai e tatou le ipu foi lea e faaigoa e le toatele o le sipuni laau i le ta’amilosaga muliuli. E na’o le tasi pe le ‘ai na maua i Paris e fa’aopoopo i le tu’ufa’atasiga o ‘ai o le tausaga. Ua tumau ai Samoa i le tulaga #10 i le tu’ufa’atasiga o ai ma o le taunuga lea o le fa’amoemoe o lenei tausaga.
Na toe itiiti lava maua le malo i le taaloga mulimuli lea na feiloai ai ma Scotland i le tauvaga o le Semi mo le tulaga #13. Ana manumalo iina, semanu e se’e tatou ile semi-final po’o le final fo’i. E le tele nisi ‘ai e toe fa’aopoopo i le tu’ufa’atasiga pe ‘ana o’o i le tulaga 13 – na’o le 5, ae sili atu lena nai lo le fuamoa aato lava. O le maualalo lea ua pa’u iai Samoa talu 2016 lea na maumalo ai ile taamilsoga i Paris.
Tu’u ia le Pool faigata na iai Samoa faatasi ma Niu Sila (NZ), Fiji ma Kenya, ae faiaina foi tatou i ta’aloga e lua na soso’o ai ma France (QF Trophy) ma Scotland (Semi 13th).
I le vaaiga ato’atoa i ta’aloga i Farani e iai itu lelei o le ‘au. E le’i iai se ta’aloga na togi ai e Samoa le solo. Aua o na tauva i ta’aloga uma ma finau lelei mai lava i le amataga o le ta’aloga muamua ma Fiti lea na faiaina ai i ‘ai e 12-35. E uma le ‘afa muamua o le taaloga lea o 12-14 e ui na muamua maua sikoa e lua a Fiti ae na finau lelei lava tama ma maua ai sikoa a Tofatu Solia ma Malu Falaniko. Ae na gata mai foi iina. O sikoa a Solia ma Falaniko na maua uma i ‘autafa o le malae ona o le malosi o le taofiofi ma le puipui a Fiti. E mataina sikoa ia a Samoa, e le’o ni mea mao aua na fa’atau tutu le ‘au ma Fiti ma maua ai sikoa ia e lua. Ae na vaaia ai foi i le taaloga lea le finau o Samoa i le pu’e ma le malosi o le tete’e atu i osofaiga a Fiti. I le vaai lautele e le i faatamala le ‘au, ae ona ua pau lava o le tulaga ua o’o iai, ona o le lelei tele o isi ‘au amata mai ia Fiti e o’o ia Scotland.
E o’o foi i le ta’aloga ma NZ, na vaaia ai lelei o le ‘au. Aemaise ai le va’ai mamao o le tama lea o Alofipo e fa’alua ona sapo e ia le polo mai le afa o le malae ma sao atu ai agai i le laina. O le metotia foi lea na faaaoga e Neria Fomai mo lana sikoa i le afa lona lua. O le isi sikoa na maua i le tamo’e malosi a Belgium Tuatagalo e atoa ai le tolu o sikoa a Samoa ile fa o sikoa a NZ na maua. Ae o le isi faigata o lenei ta’aloga o manu’aga na a’afia ai Alamanda Motuga ma Malu Falaniko.
O manu’aga ia na o’o atu ai i le ta’aloga mulimuli ma Scotland e na’o le sefulu tama na avanoa mo lea taaloga. O le taaloga lea ma Scotland o se taaloga faatiga ulu tele, aua o Samoa na muamua soso’o sikoa e tolu ma sili ai ‘ai 19-0. E mata’utia le ma’ai o tamo’e a tama ma sao atu ile laina puipui a Scotland. Ae o le afa lona lua na taofiofi ai e Scotland le polo mai lava i le amataga o le afa ma soso’o ai a latou sikoa e fa. Na iai le avanoa i toe sekone o le ta’aloga ae na pa’u le polo i le pasiga a le ‘au ae ua uma foi ma le taimi.
O le’a malolo ai nei loa le ‘au e sauni mo le Rugby Sevens World Cup i San Francisco i le masina fou. Ae ua mae’a taamilosaga a le HSBC World Sevens.
E ui e faigata le tulaga ua o’o iai Samoa, ae o le mea sili ua toe o’o tatou i le 10 pito i luga a le lalolagi. I le amataga o taamilosaga o le tausaga 2017/18 o le tulaga 13 na iai Samoa, ae o lea ua se’e i le tulaga 10.
O Aferika i Saute (SA) na manumalo ia England i le taaloga fa’ai’u i Paris. O le manumalo lea maua ai foi e Aferika i Saute la manumalo ile taamilosaga atoa. Na fa’atamala Fiti na misi ai lona avanoa tele e ‘ave e siamupini ai ile taamilosaga atoa, ina ua faiaina ia Egelani i le QF o le Ipu (Cup Championship).
Faaiuga o taaloga e lima i Paris
Samoa 19 Scotland 24
Semi-final tulaga #13
Samoa 7 France 19
Quarter-final Trophy
Samoa 10 Kenya 24
Pool 3
Samoa 17 NZL 22
Pool 2
Samoa 12 Fiji 35
Pool 1
HSBC World Series Tu’ufa’atasiga o le Tausaga – Sefulu muamua
South Africa 182pts
Fiji 180
New Zealand 150
Australia 123
England 122
USA 117
Argentina 105
Kenya 104
Canada 76
Samoa 59
