E ivasefulu suli o le suafa Matai’a i suli o Uilaefa i Vaitele Faleata ua faaee iai suafa o le Galumalemana, Tupuola, ma le Tagaloa e aofia ai ma nisi o suli ua seei i suafa tulafale o le aiga potopoto o loo faasa’osa’o ai le afioga Matai’a Lynn Autagavaia Netzler.
Ua faaopoopo atu ia nofo fou i isi suli e silia i le toa selau na faaee foi iai suafa matai o le aiga i le lua tausaga ua mavae, ae le aofia ai ma isi foi matai e silia i le toa selau na muamua atu ona faaee iai na o suafa tulafale o le aiga. Ua faaalia e se matai o le aiga ua silia nei i le 3 selau matai ua faia ma o se numela toatele ua faigofie ai ona faia taupulega o faalavelave aemaise o atinae eseese mo le manuia o suli o le aiga potopoto.
O le Aso Toonai na tea nei na faatumulia ai Vaitele i le faafotu Tupu ma le Faafotu o le vaaulu i suafa tamalii ma suafa tulafale o le afioaga o Matai’a Lynn ma lona aiga. Na usu le foaiala o Vaitele i le see lua o tulafale o Toi ma Pula ma le afio o le afioga i le Aloalii o Galumalemana faapea Tupuola, o Tagaloa ma Siliga ona o le faaeeina o suafa matai. O le susuga i le Toeaina o le EFKS i Vaiee o se suli o le Matai’a, ma le susuga i le faafeagaiga EFKS Tafa’i Galumalemana Sione o se suli foi o le aiga na taitaia le sauniga lotu na faapaia ai nofo. Na usu foi le itumalo ma malo usu na tumutumu ai le nuu.
O aso nei ua toatele aiga o le atunuu ua faasalafa suafa tamalii o le aiga ma suafa tulafale ona ua alaala le toatele i fafo ma ua tupu foi ma ola aiga i ona suli. O le itu lelei i le toatele o matai e tautuaina se Sa’o o loo seei i le tausiga o se aiga potopoto ona e itiiti ai le saofaga mo faalavelave ma mea fai a aiga ma maua ai le faamama avega.
Peitai o loo iai pea atugaluga o nisi o suli o aiga o nonofo ma alala i Samoa ona oi latou e faasuafa ma toe foi i atunuu i fafo o loo faamautu ai e itiiti lava i latou e susue faamalama oo latou maota ma laoa ma silasila pea i le faia o le monotaga ma le tautua i le Sa’o ma le aiga ae o le toatele e na o na maua loa lava o le suafa matai e fiu e tau vaavaai atu poo togi mai sana maa ua galo le faaaloalo a suli ma feoi o aiga i Samoa. O le Aso Faraile 28 o Iuni 2018 na faia ai le lotu faafetai a le aiga o Matai’a Lynn e faafetaia ai le alofa le mavae o le Atua ona o le silia i le 30 tausaga o feagai le aiga ma luitau i finauga o mataupu sa i luma o le faamasinoga o fanua ma suafa, ae ua taunuu manuia gasegase sa lofia ai upufai o le aiga ma ua maua le nonofo fealofani ma fetausia’i.
Ua iai le finagalo le Sa’o ma suli o Uilaefa i le suafa Matai’a o Vaitele Faleata o le a faaauau pea i tausaga uma ona faia le lotu faafetai aua e le gata ina manatua ai pea futia ma faigata sa feagai ma le aiga ae o se avanoa lelei e feiloai ai le aiga ma suli ua aumau ma nonofo i atunuu i fafo, aemaise foi o e o loo nonofo i Samoa.
