O lenei ua savalia le tolu tausaga o faia feutagaiga i le va o le ofisa o le Loia Sili a le Malo ma le kamupani o le Siva Afi i le manaoga o le Matagaluega o Punaoa Faalenatura ma le Siosiomaga o loo iai le pulea o le eleele sa iai le Faalapotopotoga o le Esetete Tausi i Sogi, mo le faasee ese o le kamupani o le Siva Afi, ae taatia le tusa ma le tasi le eka o se eleele o le Malo o loo latou lisiina mo le galuega o le maota mo fonotaga o loo fausia e se konekalate faufale mai Saina. O se mataupu ua fetosoai nei faapautolo a loi, ona e le o maluelue le pulega o le Siva Afi e o ese sei vagana ua faia le amiotonu o tuutuuga na sainia ai le lisi ma le Faalapotopotoga o Fanua o le Malo, le Land Corporation.
“E sese le mea lea e fai, e le fair, e faamaualuga, e le sa’o”… o se finagalo lea o le tamaitai loia o loo finauina le mau a le Siva Afi, le afioga Leulua’ialii Olinda Woodroffe i se feiloaiga ma tusitala sa auai ma le alii pule o le kamupani le susuga Lene Leota. “Aisea ua soona malosi ai le lima o le Malo i se tagata faapei o Leota o loo taumafai si ana pisinisi o loo ola ai aiga o tagata faigaluega e toa 30. O ai ea e afisi ma sapai e le tatou Malo a o ai ua soona featofai solo”, o se finagalo lea o le susuga Lene Leota. O loo faatalia nei se faaiuga a le faamasinoga maualuga ua ave i ai se talosaga a le Loia Sili a le Malo mo se poloaiga e aveesea faamalosi le kamupani o le Siva Afi ma ana meatotino uma o loo i luga o le fanua.
Peitai o loo iai foi se talosaga a le kamupani e taofi lea poloaiga sei iloilo muamua ma suesue maeaea nisi o mataupu tau tulafono i le faavae o le faaiuga a le Matagaluega o Punaoa Faalenatura e ana le fanua. O le vaega i tua o le fanua o loo iai se fale o le Malo sa faaaoga mo le pisinisi o le lolomiina o soo se laei faapea le tusia o ata mo posters o se vaega o le tautua a le Siva Afi, peitai o se vaega o lea fale o loo iai ni potu na fausia ai se ofisa o le kamupani o loo finauina nei e le tatau ona aafia i le talaina o le fale atoa.
O le vaega i luma o le fanua o loo iai le faleaiga ma le fale kalapu ua faaigoaina o le Laumei Faiaga o se meatotino foi a le Siva Afi. Peitai ua manao nei le Malo e aveese uma loa meatotino a le kamupani ona ua fai ma faalavelave i galuega a le konekarate mai Saina o loo fausia le maota mo fonotaga i se fesoasoani a le Malo lava o Saina. Faaalia e le susuga Lene Leota, sa iai se ofo a le Malo na avatu e faasee le la pisinisi o le faleaiga ma le fale kalapu i se vaega o le fanua o loo i tua o le Maota o le Malo. “Sa matou talia le ofo, peitai ina ua amata ona faia feutagaiga ae faafuasei ona toe avatu le isi tusi mai le Loia Sili ua toe faamaui i tua lea ofo. “Ou te le manao e faia se isi gaioiga sei vagana ua ioe mai le Malo i se nofoaga e ave i ai lau pisinisi ma faatupe uma e latou le siitia o meatotino uma, aua o latou e tatau ona faia”… na saunoa ai Lene. Faaalia e le faletua o Lene o Clare Leota, o loo lagolagoina e le Sui Palemia le afioga Misa Telefoni le la mau o loo finau ai. O le aso 24 o Iulai e aumai ai se faaiuga a le faamasinoga i le talosaga mo se poloaiga e aveesea ai le kamupani, faapea foi le talosaga a le Siva Afi e taofi lea gaioiga. Ua faaalia e le tamaitai loia o Leuluaialii Olinda a faiaina le kamupani o le a ia toe apiliina le faaiuga, i lona talitonuga faaletagata ma lona tulaga o se loia, e le sa’o le gaioiga ua faia e le Malo.
