Lilivau lagona ua faasāolo faipisinisi Asia i Samoa

Afioga ile Minisita o Pisinisi Alamanuia ma Leipa, Lautafi Fio Selafi Purcell
Afioga ile Minisita o Pisinisi Alamanuia ma Leipa, Lautafi Fio Selafi Purcell

O lagona ilitata, lagona faanoanoa ma lagona o le lilivau o le loto ile faasaolo o le aufaipisinisi mai Saina i Samoa ile luluu o tupe ae matamata fua le aufaipisinisi a le atunuu, e lē o manatu māmā iai le Malo.

O se tina faipisinisi e iai lona piitaga i Saina le faletua o Moe Lei Sam, tasi lea o faipisinisi ua malomaloā pea lona lagona faanoanoa ile faaletonu o ana taumafaiga ona o lana molimau, ua lē o toe ganea se taumafaiga ona ua lolofi pea le atunuu i faleoloa o Saina ona e taugofie auā e lelei tupe oloo lagolagoina a latou taumafaiga. O le molimau foi lea ase isi faipisinisi o Nuuausala Sionaia i sona lagona na faailoa ise lipoti ase nusipepa ile vaiaso ua mavae.

O lana silasila ile tulaga ua iai nei, ua lē na‘o le taulaga oloo tele ai pisinisi a tagata mai Saina ae ua faasolo lava i totonu o nuu ma afioaga. O aiga e ana faleoloa ua tapunipuni ua latou lisi atu i Saina ma faia ai pisinisi ma o le molimau a lea tamā faipisinisi, o soo se mea lava o Samoa e tu ai se faleoloa ose Saina e lolofi uma lava iai tagata faatau auā e taugofie ma lelei seleni oloo faatino ai, ae o le malapapala lea e fetaui ma nai pisinisi laiti a tagata o le atunuu e vaivai le seleni e lagolago ai. O se isi faaupuga e lē mafai ona tauva le pisinisi ale Samoa ile pisinisi ale Saina.

Ise finagalo o le afioga ile Minisita o le Matagaluega o Leipa, Pisinisi ma Alamanuia, le afioga Lautafi Fio Selafi Purcell, e lē o nofoai le Malo ise isi gaioiga e fesoasoani ai ile atinae o pisinisi a le atunuu. I sona finagalo ile nusipepa o le Sunday Samoan, ua tautino ai Lautafi oloo silasila lana matagaluega ile faia oni suiga o le tulafono ina ia faia ai se fesoasoani.

E pei ona silafia e le aufaitau e oo lava i finagalo faaalia o faipule i paeaiga a Palemene ua mavae, o le tasi lea o mataupu sa latou lagaina o le ave uma e pisinisi a Saina o le tauvaga ae faasisila atu ai le aufaipisinisi a le aufaipopo.

Ua manatu le Minisita le afioga Lautafi oni suiga ile tulafono e faafoe ai pisinisi o le a mafai ona maua ai se laveai ma fetaui ai se malae taalo e taalo ai pisinisi a Saina ma pisinisi a Samoa, aemaise lava o le au faipisinisi laiti a le atunuu.

O le molimau ola o le faatupulaia o pisinisi a tagata mai Saina i Samoa, ona o totonu o le lio o le taulaga o Apia ile agai ile itumalo o Faleata male itumalo o le Vaimauga, ua tele faleoloa ua faagaioia e Saina.