I le tele o lipoti ma tala feaveai solo e le matagi i le alu ese o le tofa Lealailepule Rimoni Aiafi ma le vaega faaupufai o le Tautua Samoa, o lea ua faamaonia nei ua sa‘o ia faamatalaga. O le faatasiga a sui tauva o le vaega faaupufai o le HRPP ma ana sui faatutu i le Aso Faraile ua mavae, na ulufale ai Lealilepule i le faatasiga ma ua avea ai ma se tasi o sui tauva o le HRPP mo le itumalo o Faleata i Sisifo i le palota tele a le atunuu o loo loma nei i le aso 4 o le masina fou o Mati.
“Ou te lagona o la‘u faaiuga lenei ua talafeagai ma le finagalo o lo‘u itumalo, ma ou te iloa foi e iai nisi ua lē fiafia i la‘u faaiuga ae o le finagalo o le itumalo ou te fai mea faalogo i ai”. O se finagalo lea o le tulafale sa avea ma faipule o Faleata i Sisifo i le Palemene ua faata‘ape.
Faaalia e Lealailepule sa galue malosi ma faia ona tiute faafaipule o le Itu Agai a o iai i le vaega faaupufai o le Tautua Samoa. E leai se mea e tasi na ia solomuli ai i le finauina o mau malolosi sa ia ave i le faigamalo a le HRPP ma e tasi lava le auga ma le autu o lona avea ma faipule o le Itu Agai ia manuia le atunuu.
Peitai i le avea o ia o se tasi o sui faavae o le Tautua Samoa, e lei tuua ai lona mafaufau pea i se manuia o lona itumalo aemaise o le tele o atinae a le Malo o loo faatino i totonu o Faleata i Sisifo. Ua ave lana faafetai i le taitai ma sui uma o le Tautua Samoa ona o le latou mafutaga i tausaga sa ia auauna ma galue ai i le vaega faaupufai aemaise o totonu o le faafaletui o faipule.
I se finagalo o le afioga Palusalue Faapo II ina ua tapa sona finagalo, sa ia faaalia ai ua uma ona la feiloai ma Lealailepule e tusa o lana faaiuga. “Ua ave i ai a‘u faamanuiaga ina ia manuia ana taumafaiga i le palota ma lona ulufale atu ai i le HRPP”.
O Lealailepule Rimoni Aiafi o se tasi o faipule finau o le Itu Agai ma o ia foi o le uipi poo le whip o le Tautua Samoa. O le paeaiga a le Palemene mai le tausaga e 2006 i le 2011 na filifilia ai e le itumalo o Faleata i Sisifo i le palota tele o le 2006.
Sa manumalo mai o se sui tutoatasi lea sa faaauau pea lona tutoatasi i totonu o le Palemene e lei lagolago i se vaega faaupufai. Peitai ina ua ta‘ape le Itu Agai sa iai i lea paeaiga a le Palemene na lagolago Lealailepule ma nisi o faipule sa tutoatasi e toe fausia se Itu Agai.
Peitai o se faaiuga na aafia ai i aulape o tulafono tumau a le Palemene lea na soloia ai o la tofi faipule ma le afioga Palusalue Faapo II na alu ese ma le HRPP i le paeaiga o tausaga ia ona o le tetee i le suiga o le itu auala.
Na faia palota laiti a ia itumalo ma toe manumalo mai Palusalue Faapo II, ae e lei toe filifilia Lealailepule. O le palota tele o le tausaga e 2011 na toe manumalo ai Lealailepule i le tofi o Faleata i Sisifo ae o le taimi lea ua faatuina aloaia ai le vaega faaupufai o le Tautua Samoa lea sa tauva ai.
O le aso vaiaso na tea nei na feiloai ai Lealailepule ma le Palemia le taitai o le HRPP ma faaoo i ai lona manao ua fia avea ma sui tauva o lea vaega faaupufai. O le Aso Tofi na tea nei na faaalia e Lealailepule na faailoa atu ai e le Palemia le talia e le komiti e iloiloina sui tauva a le HRPP lana talosaga ma faapea ona talia ai e tauva i le fu‘a a le vaega faaupufai e puipuia aiātatau o tagata.
