O le suiga lenei ua tasi ai le pulenuu, o se faiga na suia e le faigamalo a le National ina ua tulai mai mo le faafoeina o le atunuu.
E faapei ona vava mamao o Sasa‘e ma Sisifo, e faapena le vava mamao o palota na manumalo ai Len Brown i le la taufetuliga ma John Banks.
O fuainumera muamua sa faamatuuina ina ua mae‘a lona faitauina na faamaonia ai le mamao tele o le manumalo o le alii pulenuu o Manukau.
O Len Brown na ia maua palota e tusa ma le 221,635, a o John Banks e na o le 161,167. E tusa lea ma le 60,468 palota e eseese ai i lona faitauina.
O le faaiuga ua tulai mai ua aliali mai ai le matuā lē lagolagoina e tagata lautele o le aai atoa o Aukilani, o lē sa avea ma pulenuu o Aukilani, o John Banks.
Sa maitauina e oo lava i lona lava itumalo, ma aai sa manatu e maualuga lo latou lagolagoina o Banks, ua siilima ma solomuli ese mai lo latou talitonuina o lea alii.
O le isi sui tauva sa lona tolu i le taufetuliga o le alii o Colin Graig, a o le pulenuu sa iai o North Shore, Andrew Williams na maua le tulaga fa.
Na faaalia e le sui sooupu o le ofisa faipalota o Glyn Jones e faapea, o le manumalo o Len Brown e matuā mamao ese ma e latalata atu i ai John Banks.
O le saunoaga muamua a Len Brown ina ua filifilia ma ua i ona aao le manumalo, sa lē galo ai lana faafetai faapitoa mo lona itumalo ma le aai o Manukau.
Ona o le lagolagoina o lona sui mo tausaga e tolu sa tulai ai mo le tauavea o le tofi ma le galuega faapulenuu i le aai, ua avea ia taimi sa taitai ai ma avanoa lelei sa ia luiina ai le tofi o le aai tele, lea ua pale mai ai.
E lē gata i lea ae sa ia faafetai faalauaitele foi i vaega uma o Aukilani e pei o Aukilani Ogatotonu, Aukilani i Sisifo, ma North Shore, ona o le tutufaatasi atoa ai ma le faatuatuaina ma le talitonuina o lona tagata e ala i le palota sa faia.
O le aso muamua o le masina fou o Novema lea ua fuafua e tatau ona nofoia ai le nofoa o le pulenuu mo le Super City, ma amata ai loa galuega faagasolo mo le aai tele o Aukilani.
Ae o le lauga a John Banks ina ua faamatuu ane fuainumera ma mautinoa ai lona matuā faia‘ina, sa ia ta‘ua ai lona taliaina o lona malolo.
O lana saunoaga lava lea sa ia molimoli ai foi ma lona agaga faafetai i lana paga sa la tauva, Len Brown, ona o lona manumalo.
Sa ia viia foi le taumafai o Brown mai le taimi umi sa faagasolo ai faatosina ma tausinioga a o lumanai ai le palota.
O le faaiuga o lana saunoaga sa tautino ai e faapea e ui ina ua malolo, peitai o le a ave pea lana lagolago mo Len Brown i le taimi o lana nofoaiga.
