Lelei le siva uosi a le CTR Single Golden Club

E manaia le fai ma saasaa faa-Samoa pe siva foi i soo se ituaiga siva e aogā mo lo tatou soifua maloloina, e oo foi i le siva uosi fai ma feliuai ai lou tino, pe silafia tulafono pe leai, uosi pea pau lava ina ne‘i e tu i le vae o lau paga.

E iai ona tulafono ma ona taga faapitoa, ae onā loa le pa‘u o le sogaimiti Samoa, ia o le taugā lelei lena o le uosi, tuu pea tulafono i le au polofesa e faasoa ma faatino e latou, ae fai o tatou vae ua tatala le foloa.

O le Aso Toonai o le Valentine na faia ai se fiafia faapitoa a le Kalapu a le au single le CTR Single Golden Club i le pitonuu o Preston, o le faamoemoe ina ia luilui ma fiafia faatasi ai le paia ma le mamalu o Samoa e faailogaina ai lea foi aso faapitoa, ma faai‘u ai i le tauvaga siva Uosi e feliuai ai lagona o le alofa i luga o le foloa.

Molimau se uo mamae a la tatou auaunaga, e matagofie le silasila maimoa ae faatino e tama ma teine sasa‘o e ana le taleni lea foi ituaiga o siva, e ui lava ua masani tatou i le siva uosi, ae e tele lava lona faatinoina e lē o vaaia tele i siva, se‘i vaganā ai faamoemoe faapitoa faapea.

O le faaili malosi a le Mt Fao na faafiafiaina lea po, ma o le molimau foi lea a le alii pule o le faili, e mālie le uosi a le onā, ae uigaese le mataina o le tagata e iloa faatino sa‘o le siva. Na ia saunoa foi na mae‘a le po ae ua lē uma le fia uosi o tagata, talosia ia toe faia se isi uosi i se taimi lata mai.

Emi Tafiti ma lona alii ia Grant Sheridan mai Adelaide