Ole aso 2 o Setema na tuuvaa atu ai le ‘au lenei a tamaitai a Aukilani le Black Widow e fia auai i faalagamaea o taaloga kirikiti a tamitai ole Teuila i lenei tausaga. Ma o lenei au o se taimi muamua lenei ua mafai ai ona malaga atu i Samoa i lenei taamilosaga, e pei ona faia i tausaga taitasi, i lalo ole taitaiga ale taitai malaga ia Mandy Siitia male pulega ole ‘au.
E 20 le aumalaga e aofia ai le autaaalo e 17 male komiti e toatolu. E malaga atu le Black Widow oloo nonofo le ‘au a tamaitai mai Leauvaa lea ua tolu tausaga o siamupini ile Teuila.
E tasi le ‘au na malaga atu i fafo ae tolu ‘au a Samoa na auai; ole ‘au a tamaitai mai Leauvaa, Tanugamanono, Vailele ma le Black Widow. O le faagasoloina o nei taaloga sa faaalu faataamilosaga auā e na ole fā ‘au. I taaloga muamua ale Black Widow na latou faatoilaloina ai ‘au malolosi nei e lua a Vailele ma Leauvaa ma sao mai ai i luga e faatalitali le taunuu mai ole ‘au a tamaitai a Tanugamanono lea na sao foi i luga e leai sana faia‘ina.
O Tanugamanono ose tasi lea ‘au malosi ma ua leva foi i totonu ole Teuila ile tele o tausaga, tele foi o taamilosaga faapenei e pepese ai le au lenei male ipu ole siamupini, ae sa sue siamupini foi ma Leauvaa ile Teuila ile tausaga ua mavae ma faia‘ina ai.
Faailoa ele taitai malaga ia Mandy Siitia e lei faigofie le latou taaloga mulimuli lenei ona e fai foi si lelei o Tanugamanono. O latou sa tuli ‘ai, e tatā le masaga ale Black Widow toe 12 ni ‘ai oloo manaomia, ma o tamaitai nei e toalua na laua faato‘ato‘aina le loto popole ole Black Widow ma manumalo ai ile suega siamupini ile ‘au a tamaitai ole Teuila i lenei tausaga 2016.
Faavaeina o le Black Widow
Ole susuga ia Mandy Siitia oloo avea nei ma taitaimalaga mai le ekalesia PIC, faapea Lisa ma Ron Burgess mai le Perepereane ma Wendy Te‘o mai le EFKS New Lynn, o i latou nei sa faavaeina mai lenei ‘au ile tausaga 2012 ile itu i Sisifo o Aukilani.
Ile latou maitau iai ile lima tausaga ua tuanai ua amata ona leai ni ‘au a tamaitai mai ekalesia eseese e auai i totonu o taamilosaga kirikiti i Aukilani, ma o lea na latou faavaeina ai loa lea au mai Aukilani sisifo, mai ekalesia eseese e pei ole Mamona, PIC, EFKS male Metotisi, e auai atu i faalagamaea nei i Aukilani, ae lē gata i lea ia mafai ai foi ona toe faaauau le taleni male meaalofa oloo i fanau. Ole tele o nei tamaitai na soifua a‘e i Niu Sila nei ae na amata foi ona faavaeina mai lo latou olaga taalo i totonu o latou ekalesia.
Tausaga ma Tulaga i Taaloga
2012 – Pasefika Shield 1st Place
2013 – Champs of Champions st Place
Pasefika Shield 3rd Place
2014 – Pasefika Shield 1st Plac
Challenger Cup 3rd Place
2105 – Pasefika Shield 1st Place
Teuila 1st Place
2016 – Pasefika Shield (East Auck) 1st Place
Teuila Shield (South Auck) 1st Place
Big Bash Cup (East Auck) 2nd Place
*Big Slash (West Auck) 1st Place
*Teuila Festival Samoa 1st Place
O lea ua toe tapenapena atu le Black Widow ile Teuila ole tausaga fou e toe malaga atu i Samoa e puipui lana siamupini e pei ona lele mai ai male Ipu ole Teuila i lenei tausaga.
Ole faamalo male faafetai ale susuga ile taitaimalaga ia Mandy Siitia male komiti faapea le ‘au atoa ale Black Widow ile tapuaiga a aiga faapea ekalesia male atunuu ile tu‘i atu o le mulipapaga ma tapuaia o latou faiva a‘o masii atu ai i Samoa auā le laumea toenuti male talutalufou lea ua a‘e manuia lo latou faiva, ona o le nofo tatalo atu o aiga, ekalesia male atunuu.
