O le tau gaga ifo o le la i lona nofoaga tumau i le afiafi o le Aso Toonai aso 8 o Novema, na osia ai le feagaiga i le tuufaatasia lea o le aiga fou o le tamaitai o Valerie Tala Pritchard faapea le alii o Tyrone Faaee.
Sa faia lea sauniga paia i le mālū ma le paolo o laau o loo siomia e le vai i le nofoaga o Forest Lake, lea e masani ona malolo ai tama ma teine pe a faamautu se mafutaga, pe toe faalelei ai foi ni misa a ni ulugalii ona o le manaia o le agiagi a le savili e toe suia ai lagona faanonoa i le fiafia.
Ai o le ala lea na filifilia ai e le ulugalii fou e saini ai pepa o le la feagaiga. Na toe faamanatu i le saunoaga a le taitai o le sauniga le susuga i le faafeagaiga o le Ekalesia AOG mai Sini, Ps Mika Sāvea, le faaipoipoga a Atamu ma Eva sa faia i le togalaau o le faatoaga i Etena, o le ala tonu lea o le faamoemoe o le aiga fou.
O mātua o le alii faaipoipo o le tamā ia Sila Iulio mai Levi Saleimoa ma le faletua ia Taofiupu Faaee mai Fasitootai. O tuaa o le tamaitai faaipoipo, o le tofa ia Puaalatamai Fesola‘i Taualagi mai Vaigaga ma le tausi ia Kuinileti Pritchard mai Faleasiu.
O le tofa ia Puaasegisegi Numia Pritchard mai Niu Sila sa fai ma fofoga o le aso, ae o le tofa ia Puaasegisegi Lausei Pritchard sa fai ma fofoga o aiga na lua e momolia se faafetai i le aufaigaluega a le Atua ma Samoa na potopoto.
O le susuga ia Faapaia sa faaleoina se faafetai ona o le felanulanuai o fuafuaga o le aso aemaise le fofoga taumafa ma tapenaga a aiga na lua.
