Sa faapea e vave ona oo le tulafono taufaaofi faasino i le faatuina o se Fono Faatonutonu mo galuega faatusitala ma le aufaasalalau poo se Media Council, peitai ua oo mai i le tusitala ni molimau faamoemoeina ua faaalia ai, ua tuai le galuega a le komiti faapalemene o loo tagofia le tulafono taufaaofi ona e lē o iai se itutino faaletulafono poo se Legal Body mo tusitala ma tagata faasalalau.
Ua fautuaina ai e taitaifono ma le komiti nisi o sui tusitala ma faasalalau matutua, ma ua sinasina lauao i le galuega ina ia faatino se gaioiga e faavae ai se faalapotopotoga, ina ia toe foi le tulafono taufaaofi i le Palemene ua iai ma se itutino aloaia.
Ua mafua lea fautuaga ona o le taimi nei e lē o toe iai se faalapotopotoga e mafua ina ua solofua le lesitala o le faalapotopotoga a tusitala le JAWS sa avea ma itutino sa tapuvae tasi i ai lea galuega.
Na mafua ona solofua pe deregister le JAWS ona ua lē tausisia e le faalapotopotoga aiaiga o le tulafono o kamupani ma faalapotopotoga tumaoti, o le tuuina atu o lipoti ma faamatalaga o tupe i ana galuega i le ofisa o lesitala mo faalapotopotoga lea o loo aofia i le auaunaga ma le tautua a le Matagaluega o Leipa.
Faaalia e se tamaitai tusitala ma faasalalau sinia ua pulea nei se tasi o faletelevise ma leitio, ua faailoa ane e le komiti ina ua valaauina o ia mo sana molimau, e tatau ona faatu se faalapotopotoga ona e lē mafai ona toe foi le tulafono i le maota fono o le Palemene, ae leai se faalapotopotoga o tauaveina le pulea o galuega a tusitala ma tagata faasalalau.
Na fesiligia se tasi o tamaitai tusitala matua sa avea ma sui o le komiti faafoe o le JAWS i le aliali mai o lea tulaga. Peitai sa ia faailoa mai e sese lea tulaga ua faailoa mai e le komiti a le Palemene. “O loo legal le tatou JAWS, ae e iai tagata na ei tua o le mataupu lena”.
E lei auiliiliina mai le finagalo o lea sui tamaitai. O le tulafono taufaaofi mo le faatuina o se fono faatonu mo tusitala ma le aufaasalalau o loo aofia ai i totonu le toe faatuina o le JAWS i se faiga ua tuu ai i totonu o le tulafono.
O loo aiaia a pasi loa le tulafono taufaaofi ona aloaia loa lea le toe iai o le faalapotopotoga ma ia faaauau e sui o le komiti faafoe sa iai mo le tausaga atoa, ona latou valaau ai lea o se fono faaletausaga e toe filifilia ai nisi o le laulau ma sona peresetene.
E lei manuia sailiga mo se finagalo o le Loia sili a le Malo i lea tulaga ua aliali mai, auā o le ofisa o le Loia sili sa galulue ma le sui tusitala o le JAWS e fausia le tulafono taufaaofi lea na fausia ai se finagalo e tuu le JAWS i le tulafono taufaaofi ina ia mafai ai ona toe faatuina.
Peitai la o lea ua aumai le tuualalo a le komiti a le Palemene e lē mafai ona e lē o iai se itutino faaletulafono mo tusitala ma tagata faasalalau.
Ua maua ni molimau e faapea ua alu nei le tala‘iga a nisi o tusitala matutua i le fia maua o se feiloaiga e talanoa ai le mataupu ma le faamoemoe e faatu ai loa se faalapotopotoga a o lei toe oo le tulafono taufaaofi i le Palemene mo le faitauga faatolu ma pasia.
