E lei iai se tama fusu ole paga mamafa e lei valaau ile igoa o Joseph Parker ina ua mae‘a lana fusuaga ma Razvan Cojanu. Ona ole talitonuga o tama fusu uma, e faigofie ona faatoilalo Parker, pe a fua ile fusuaga na faia ile vaiaso na tea nei. E ui ina mamao le malo o Parker i ‘ai, ae e le ose fusuaga na vaaia ai se matautia ole fusu a Parker, e pei ona vaaia nei ia Anthony Joshua.
Ile mae‘a ai ole fusuaga na ta‘ua ai e Hughie Fury e matua faigofie lava i a te ia ona faatoilalo Parker. “E foliga e lei iloa e Parker poo le ā le ituaiga fusu e faaaoga ia Cojanu. E leo suia ai ou lagona ia Parker. Na ou ta‘ua muamua a ma feiloai, ou te tuia lava Parker ma oti ai i totonu ole maea.” ole tala lea a Fury.
E le na‘o Fury na faifai ia Parker. Ole tala a Tony Bellew o Peretania ia Parker, ole taimi e saini ai le feagaiga ta te fusu, ole taimi foi lea e uma ai lau nofoaiga Parker.
Ole talanoa mai i Amerika, o Parker ole Siamupini maualalo lea ale Paga Mamafa oloo iai nei. Pe a faatusa ia Anthony Joshua (IBF, IBO, WBA) ma Deontay Wilder (WBC).
E oo foi i petipetiga i totonu o Peretania, ua tuu ele Sports Betting le va o Parker ma Anthony Joshua ile $9 mo Parker pe a fusu ma Joshua ile na‘o le $1.05 a Joshua. O lona uiga, e manumalo Joshua ile taamilosaga amata ose la fusuaga. Faapea foi ma le lagona o Dillian White o Peretania, o se alii fusu iloga foi ole paga mamafa. Fai mai a ia, e le umi se taimi ma te faataututu ai ma Parker ae taatia. E ui i ia faiga upu mai fafo, ae e le o popole iai Laauli ma lana pulega. Ta‘ua e Laauli faatoa iloa lava le mea moni pe a oo ile taimi late fusu ai ma le tagata, e ese lava le tele o tala, ese le taimi e fetoai ai lima. Peitai, oloo tumau pea le iai pea ole avanoa o Hughie Fury e fusu ai ma Parker. E manino le tulafono ale WBO ile avanoa o Fury e fusu ai ma Parker, o ia e sosoo. E ui na faamaamulu ese ma le fusuaga ile vaiaso ua tea, ae e manino lava le tulaga o Fury ole tagata muamua ale WBO, o ia foi oloo iai le aiatatau e lui ai Parker.
E 30 aso oloo tuu ele WBO ile vaega a Fury ma le pulega a Joseph Parker e talanoa ai mose aso e faataunuu ai lea fusuaga. Ole manatu o David Higgins e tatau ona fai le fusuaga i Samoa, aua o lea e pule Duco Events ile mea e fai ai.
Ole fai ai i Samoa ole fusuaga ina ia matua tele ai le avanoa o Parker e manumalo ai ia Fury. E le masani Fury ile fusu ile tau vevela.
Ae oloo manino foi le matuā musu mai o o Fury e sau i Niu Sila, ae sili atu ona lē fia sau Fury i Samoa. O lona uiga ole a toe toso foi e latou le mataupu e pei lava ole mea lea na tupu nei ile fusuaga ole vaiaso ua tea. Afai e le mafai ona maua se tonu ile 30 aso, ona toe foi lea ole fusuaga ile tauofoga ile va o Duco Events ma Hennessey Sports a Frank Warren le pulega a Hughie Fury.
Atonu ole mea lea ole a taumafai iai Warren ma le pulega a Fury, ina ia faaleaogaina aiātatau oloo ile Duco Events, mai le tauofoga muamua, ae fai se isi tauofoga fou. Afai ae fai se isi tuaofoga fou o lona uiga, e mautinoa ole avanoa le o Frank Warren ma lana pulega, e toso atu ai i Peretania le fusuaga e faia ai.
