Ua savali nei ile lua vaiaso o toesea ma Samoa le afioga ile Palemia susuga Tuilaepa Lupesoliai Sailele Malielegaoi mo ni siaki faafomai i Niu Sila i lona soifua maloloina. Ole Aso Tofi ua mavae na mapuna a’e ai ni faamatalaga e faapea ua fono faalilolilo nisi o faipule ole HRPP ma ua laumanuia ai le iai ose finagalo ole a filifilia se tasi o faipule sa avea ma Minisita ole Kapeneta e avea ma Palemia ma Taitai ole vaega faaupufai.
Na alu le sailiga mo le fia maua ose faamatalaga pe moni nei tala ua mapuna mai i fafo a’o toesea le taitai ole Malo ma le vaega faaupufai ole HRPP. Na maua le avanoa e fesiligia ai le tofa Lealailepule Rimoni Aiafi ona o lona suafa oloo laumanuia ai i tala salalau sa iai ile fono faalilolilo ase vaega o faipule ole latou pati.
“Vaai, ouke ofo i kagaka ua lakou faia gei kala sese ae ka’u ai ma lo’u igoa ae ouke leiloa poo fea sa fai ai lega fogo. O a’u lea ouke i Savaii o lea ouke saugi e foi aku i Upolu”. Ole finagalo lea ole tofa Lealailepule ina ua maua le numera o lana telefoni ma valaau loa iai le tusitala. Ole talanoaga lea ile Aso Faraile na tea nei ae oloo ile uafu i Salelologa le minisita lagolago ua sauni e foi i Upolu. Na faaalia ele minisita lagolago e iai tagata ua latou faia ni tala faatupu ua taumafai ai e saveu le filemu o finagalo o faipule ole vaega faaupufai ae o tua atu o ia tala faatupu ole taumafai e faavevesi loto ma finagalo ole faafaletui ae oloo sii gasegase le Palemia ole taitai ole HRPP.
Ole a lē ta’ua le suafa ole faipule sinia ole vaega faaupufai ua laumanuia lona suafa e faapea o ia lea ole a see atu ile tofi Palemia ma le taitaiga ole vaega faaupufai. Na faaalia e Lealailepule e matuā sese ia faamatalaga auā e le mafai ona faia faapea se filifiliga. Na fiu e tuu fesilisili atu i nisi o faipule ole HRPP ae leai ni o latou finagalo na tuuina mai.
Ua na’o le faapea mai lava, “se o ai foi ua na faatupua na tala o lea e tapuaia uma ele faafaletui le opea i fafo ole Palemia i ana siaki faafomai?” Ise pepa o faamatalaga mai le ofisa o faamatalaga faalauaitele ale Malo ile vaiaso ua mavae, ua faailoa mai ai oloo sologa manuia pea le siiga gasegase ale taitai ole Malo le afioga ile Palemia, Susuga Tuilaepa Lupesoliai Sailele Malielegaoi.
