Leai se leoleo poto faapitoa suesuega o laau malosi

O nisi o laau malosi ua faatama‘ia e leoleo
O nisi o laau malosi ua faatama‘ia e leoleo

Ua iai leoleo ua aoaoina faapitoa i suesuega o tulagalima poo finger print, ae e leai se leoleo ua iai se tomai faapitoa e suesue ai ni mataupu e faasino i ituaiga o fana ma ututau eseese.

Ua tautino le sooupu ole Matagaluega o leoleo le susuga Su‘a Muliaga Tiumalu, ole mafuaaga lea ole tuai ona maua o faamatalaga e faatatau ise tamā matua ua 60 ma ona tupu tausaga o lona matua na fano lona soifua ise faalavelave i Faleatiu ile amataga ole masina nei o Setema.

Ua mautinoa oni manu‘a mai ni pulufana na aafia ai le patua male muliulu ole tama ua maliu, peitai e lē o iloa le ituaiga o laau malosi e ana ututau na aafia ai lē ua maliu.

“Ole mafuaaga ona oloo ave i fafo vaega o mau a leoleo e suesue ai ona faatoa maua ai lea ose faamaninoga ile aupega tonu na faaaogā”. Faaalia foi e Su‘a ole a mafai ona taofia le toe alu o tupe ale matagaluega e ave ai ni mau oni mataupu tau laau malosi i fafo e suesue atili ai, pe a iu mai se alii leoleo oloo aoaoina nei i fafo i tomai mole faatinoina o lea vaega tāua o galuega a leoleo.

“Oute iloa e lei uma le tausaga lenei ua faaiuina mai a‘oa‘oga ale susuga ile alii leoleo ona uma lea ole tuai ona maua o taunuuga o suesuega i faalavelave e aafia ai laau malosi’, na saunoa ai le sooupu ole matagaluega o leoleo ile feiloaiga masani ma tusitala i Aso Tofi taitasi. Ua faailoa e Su‘a nisi o faamatalaga sa lē faailoaina muamua ina ua tulai mai le faalavelave i Faleatiu. Na saunoa le sooupu e faapea ole tamā matua ua maliu e faamautu i lona aiga i Savaii ae sa malaga mai i Upolu e asiasi i lona afafine e nofotane ise aiga i Faleatiu, lea na maliu ai ile faalavelave oloo tau sailia pea poo ai na faia.

“Ole tulaga faanoanoa lena ile mataupu lenei, ona osi tamā matua sa asiasi isi ona afafine ma nofo ai lava masalo poo le lua ile tolu masina ae tupu ai loa le faalavelave ua maliu ai”. Na maua atu le tino maliu ole tamā ise vaega ose fanua e tusa le mamao ma le 300 mita mai le fale ole aiga oloo mau paolo ai lona afafine. Ole itu e lē o mafai ona iloa e leoleo ile taimi nei, pe sa faatino le faalavelave ile tamā matua ise isi nofoaga ona avane lea ua faataatia ile vaega na maua atu iai lona tino maliu. O lē ua maliu e pei ona faailoa e leoleo sa alu e faipopo ae tupu ai le faalavelave ua fano ai lona soifua.

Ua mae‘a ona falelauasi le tamā matua ae e lei maua lava e leoleo poo ai se tagata poo nisi foi na faia le solitulafono ole umia ole laau malosi na faaoo ai manu‘a ile tamā. E lē o faailoaina e leoleo le nuu o lē ua maliu i Savaii ae na ave iai lona tino maliu mo ona toe sauniga.