O le tali lea a le Alii Palemia ma le Minisita o le Soifua Maloloina i se fono i le afiafi ananafi ma tusitala i Samoa e faalauiloa ai e lē o aafia Samoa i le faama‘i ua pipisi solo nei i le lalolagi le faama‘i o le Zika.
O se faama‘i ua mafua mai ona o le namu ma e talu ona amata le tausaga e leai lava ma se tasi ua ta‘ua e lē Soifua Maloloina ua faamaonia o maua ai ae o lea ua salalau solo faamatalaga aemaise mai i Niu Sila ua faapea mai o Samoa le atunuu e tasi o le Pasefika ua i lalo o le lisi o atunuu e tatau ona faaeteete tagata tafafao e asiasi i ai ona o le aafia ai i le faama‘i poo le siama o le Zika.
Ta‘ua e le alii Palemia ua masalomia foi le mafuaaga i tua o nei faalauiloa talu ai e lei mautu atu i Samoa nei ni fuainumera o lea faama‘i ae ua faalauiloa lava lea tulaga ma na ta‘ua e Leausa Dr Take Naseri le ofisa sili o le Matagaluega o le Soifua Maloloina e lē talafeagai tele le faaiuga na faia ma faasalalau ai lea tulaga.
O le tausaga na tea nei lea na faamauina ai e toatolu i latou na aafia i le gasegase lea na ta‘ua e Leausa e masalomia foi le faamaoni o ia suesuega ona soo se faama‘i lava e aumai ai ni lapataiga faapea e tatau ona sasao ma pepesi e pei ona vaaia i le Dengue poo le Chickungunya ae uma lelei lava le tausaga e na o le toatolu lava i latou na maua mai i Samoa nei na maua i le Zika. Talu mai la le amataga o lenei tausaga e leai lava ma se faamaoniga ua maua mai faapea ua aafia nisi i le atunuu i lea faama‘i.
O lea ua toe foi mai nisi o suesuega e tusa ma le 20 le aofai na faatali i ai le Matagaluega o le Soifua Maloloina pe faamata o aafia nei tagata i le faama‘i ae o lea na saunoa le afioga Tuitama Dr Talalelei Tuitama, le Minisita o le Soifua Maloloina e leai ma se suesuega ua foi mai e faamaonia lea tulaga o lona uiga e leai ma se suesuega na avatu i fafo e aafia ai se tasi i lenei siama.
O le Zika e pei ona silafia e mafua mai ona o se namu lea foi e maua i le atunuu ma o puipuiga o le Zika e pei lava o puipuiga faaauau i le fana ma le faatama‘ia o nofoaga e tuufua ai le namu e pei o vaivai atoa ai ma nofoaga e ona to‘a ai le suavai i otaota i totonu poo fafo foi o le fale.
O loo iai foi lapataiga e faaaogā fana ma kulimi e tutuli ai le namu aemaise o le fai o laei e ufiufi ai le tino ma tainamu e momoe ai ina ia puipuia ai le atunuu.
O auga o le gagase o tino ma le vevela auga aupito toatele o le ma‘i ma e ala ona faigata le Zika ona o tina ma‘itaga e aafia ai fai‘ai o tamaiti ma e laitiiti ai le lapoa o le ulu o le pepe fou.
O Amerika lava lea e tele ina vaaia ai le sosolo faasolo atoa o le Zika ma Amerika i Saute ae o Tonga ma Amerika Samoa ia ua vaaia le toatele ua amata ona lipotia le aafia ai.
O Tahiti foi le isi motu o le Pasefika ua iai lapataiga ona o le siama lava lenei peitai o Samoa lea ua faamautu mai e ona taitai e lē o iai se tasi ua aafia i le gasegase ma o loo saogalemu lava Samoa i le agai mai ai o tagata tafafao asiasi mai i fafo.
