O le alii Samoa o Luteru Ross Poutoa Lote Taylor, ua filifilia nei e avea ma kapeteni o le aukirikiti faavaomalo a Niu Sila, le Black Caps. O ia o le tagatanuu Samoa muamua ua ausia lea foi matatia mo tagata Samoa lava ia, i le tulaga ua filifilia nei i ai. E le gata i lea o ia o le Samoa lona lua ua ulufale ma avea o se tama taalo i totonu o le ‘au faavaomalo a Niu Sila. O le alii o Murthy Su‘a sa uluai avea o se tagata Samoa muamua i le Black Caps a Niu Sila sosoo atu ai ma Ross Taylor.
O Luteru Ross Poutoa Lote Taylor, na soifua a‘e i Lower Hutt, ma ua 27 nei tausaga o lona soifua. E masani ona faaigoaina e le toatele i se igoa faipaaga o Rosco. O se tama taalo o loo ua faatulagaina i le kalasi muamua poo le vaega muamua o tama taalo o le taaloga kirikiti a Niu Sila.
O loo umia foi le tulaga maualuluga o ‘ai ma sikoa na ia mauaina. E 132 i le taamilosaga a State Sheild, i le 2003 ma le 2004, ae 217 i le State Championship 2007 ma le 2008.
E lei faigofie le filifiliga sa feagai ma le alii faiaoga o le ‘au a Niu Sila, John Wright, faapea le alii faatonusili ma le pulega o le faalapotopotoga kirikiti i le atunuu.
Ona talu ai o le isi tama taalo sa toalua ma Taylor i le faiga filifiliga, o se alii sa matua iloga foi lona faatinoina o le taaloga, ma o se tasi foi o fetu pupula o le ‘au. O Brendon McCullum, o le isi lea na faia i ai le filifiliga faatasi ma Ross Taylor.
Peitai e ui i lea, sa tulaga ese le alo o le atunuu, ona e le gata o se tasi sa vaaia ma maitauina le alualu i luma ma le faatumauina o le lelei o le taalo i soo se gaioiga i totonu o le malae, ae sa vaaia foi o se tagata e lelei ni ana faaiugafai.
E faaopoopo i ai ma faamaumauga ua mae‘a faamauina i lona faato‘a tulai mai, aemaise ai o ia sa kapeteni i le aukirikiti faavaomalo a Niu Sila i lalo ifo o le 19 tausaga. Ua mae‘a foi ona faataitai le alii o Ross Taylor i le tofiga kapeteni mo le ‘au tele, i le taaloga e tasi le aso sa faia i le masina o Mati o le tausasga talu ai 2010, i le va o Niu Sila ma le ‘au malosi a West Inidies. O le taaloga lava foi lea na ‘ai silia ai, i ‘ai e 70 sa ia mauaina, ma manumalo ai Niu Sila i lea foi taaloga faitauina.
O le tofia o Ross e kapeteni i lea taaloga, sa faafuasei ona talu ai na faaletonu le ua o le alii kapeteni o le ‘au, Daniel Vettori ma toe faamaamulu ese ai e le taalo, ae toe 30 minute amata le taaloga. O se tasi lea o faamaufaailoga sa amanaia tele ma faatauaina e le alii faiaoga ma le pulega i le taimi o le filifiliga o le taitai fou mo le ‘au.
O le finagalo lea na faailoa ma saunoa i ai le alii faiaoga John Wright. Saunoa le faiaoga e tele isi mafuaaga sa vaavaai toto‘a i ai, peitai e iai lava agavaa ma uiga e ese ai le alo o le atunuu ua tulai mai.
Agavaa ma suiga na ausia, mo le atina‘eina o lona tulaga i le taaloga Niu Sila vs Sri Lanka (One Day)
O lana uluai taaloga i le va o Niu Sila ma le ‘au malosi a Sri Lanka i le aso 28 Tesema 2006, na ia maua ai ni ‘ai e 128 mai polo e 133.
O le taaloga lea e tasi le aso, ma e aofia ai le 12 ‘ai ta‘i fa na ia taina, ma ono e ono i le tuufaatasiga lava lea.
Niu Sila vs Ausetalia (One Day)
O lana taaloga lona lua i le va o Niu Sila ma Ausetalia, i le aso 18 Fepuari 2007, na ia mauaina ai e 117, ma o le sikoa lona lua lea le maualuga na maua e tagata taaalo Niu Sila, i le va lava ma Ausetalia.
I le 2010 na faamauina o se tasi o taaloga aupito i vave talu ona feiloai atunuu e lua, na mafua lea ina ua vavae ona maua e le alii o Ross ‘ai e 138, ma manumalo ai Niu Sila.
Niu Sila vs Pakisitani (One Day)
Na toe ‘ai silia ai foi i le 131 ‘ai na maua mai polo e 124, i le aso 8 o Mati o le tausaga nei 2011 i le taamilosaga a le ICC Cricket World Cup.
O ‘ai na maua e aofia ai ono e fitu, ma fa e valu, ma sa fesoasoani tele mo le siitia ai o le tulaga o Niu Sila i lea lava taaloga, ae o se matatia foi i le va ma Pakisitani lava ia ina ua faato‘a ausia ai se sikoa maualauga e 302.
Niu Sila vs England (One Day)
O le tausaga e 2007 ma le 2008 i uluai taaloga sa faia ai, na maualuga ai foi taumafaiga a le alo o le atunuu. E 120 ‘ai na ia mauaina i le taaloga sa faia i Hamilitone, ma sa faamauina foi o le tagata ‘ai silia i ia tausaga e lua.
O le 2008 na ia toe tataeina ai foi le isi matatia ma toe ‘ai silia ai i le 154 e aofia ai 6 e lima, ma fa e 17 na ia taina i le masina o Me 2008 ma le ‘au a Egelani.
Niu Sila vs Initia (One Day)
Na ia maua ‘ai maualuga e 151 mai polo e 204, i le taaloga sa faia i Napier i le 2009, ma sa manumalo ai foi Niu Sila i lea taaloga mataina. Na sosoo ma le isi taaloga ma le ‘au lava a Initia, ma o se tasi foi o taaloga faitaulia ina ua fai si umi o poloka pea e Ross faatea a lea ‘au, ma taofiofi pea lava seia oo ina maua ona ‘ai e 107, ma tutusa ai le taaloga.
O faamaumauga e pei ona silasila i ai, o nisi o taaloga sa matua tulaga ese ai le tulai mai o Luteru Ross Poutoa Lote Taylor. Sa avea o ni faamaumauga sili ona malolosi e faamaonia ai le filifilia o ia e fai ma kapeteni o le aukirikiti faavaomalo a Niu Sila.
E le gata i le tulaga na ia ausia i taaloga faavaomalo, ae sa maoae lava foi ona faamaumauga i taaloga a kalapu ma taaloga faalotoifale sa taalo ai. O nisi o faamaumauga o loo aliali ai le maualuluga o ‘ai e maua e Ross, a o le tulaga foi i le faatea ma le talituaa.
O loo matua atoatoa uma vaega o le taaloga ma lona faatinoina i le taleni a le alii o Taylor.
