Lē toe sao faiga faaalatua – lē maua suafa i lisi o tagata palota

O faiga faaonaponei ua faaaogā ai masini komepiuta ma isi ituaiga o meafaigaluega faatekonolosi ua fesoasoani tele lea i le galuega a le ofisa o le Komesina o faigapalota ua mafai ai ona lē toe tutupu faaletonu sa aliali muamua mai i isi faigapalota e saili ai tofi faipule o le Palemene.

O le palota laitiiti a Sagaga Le Usoga lea na faatino i le Aso Faraile ua mavae na faaalia e se tasi o ofisa sinia o le ofisa o le Komesina o faigapalota le susuga Francis, na agai atu nisi i le fale palota faapitoa le maota o le EFKS i Mulinuu e fia faatino le latou aiā tatau i le faia o a latou palota. Peitai na saili atu o latou suafa i le lisi o tagata palota o lea itumalo, e lē o maua ai.

Na saunoa mai le alii ofisa sinia, e lē o toe maua faaletonu sa iai muamua o le saili atu o ni suafa sa lesitala, e lē o maua i faamaumauga o lola palota a itumalo o loo iai suafa o i latou ua mae‘a ona lesitala.

O le taimi nei e pei ona saunoa mai le alii ofisa sinia, pe o le ā lava le ituaiga o faiga e atagia ai ni gaioiga faaalatua, e maua uma lava auā ua iai le tekonolosi fou ua faaaogā e le ofisa.

O le saunoaga a le susuga Francis o le mea mautinoa e lei lesitalaina lava suafa o i latou na afea le fale palota o le maota o tupulaga o le EFKS.

“E lē toe mafai ona fai mai se tasi o ia sa lesitala ae lē o maua lona suafa i le lisi o tagata palota o lena itumalo, o faamaumauga uma ua lē o toe iai ni tulaga faapea e toe aliali mai ai”. Sa iai ni faaletonu faapenei sa tutupu i isi palota tetele ma palota laiti ona sa iai vaega na mafua ai.

Peitai e lē o toe mafai ona tupu i le taimi nei. E ui ina sa iai nai ia to‘a i le faagasologa o le palota laitiiti a Sagaga Le Usoga, ae sa molimau mai le alii ofisa sinia o le ofisa o le Komesina o palota, sa sologa manuia mea uma.

E toafā sui sa tausinio ma o sui uma o le HRPP mai afioaga e tolu o lenei itumalo e aofia ai Malie, Afega, ma Tuanai. E toalua sui o Afega ae taitasi sui o isi afioaga o Malie ma Tuanai na tauva.

O le mae‘a o le faitauga e lei aloaia na faailoa mai ai le mamao o palota na maua e le sui tauva mai le afioaga o Malie le susuga Seiuli Ueligitone Seiuli e 735. O le tasi o sui tauva mai Afega o Fata Tulasunu‘i Paulo P Seuseu na tulaga lua e 492 palota na ia maua, pito i ai le isi sui tauva o Afega o Logo Fetaomi e 392 palota.

O le sui tauva o Tuanai le susuga Vaatuua Alefosio na ia maua palota e 121. E 2,917 le aofaiga o tagata palota o lea itumalo na aloaia e faia a latou palota peitai e na o le 1,744 tagata palota.

O lona uiga e to‘a 1,173 tagata palota o Sagaga Le Usoga e lei palota. O aiaiga o le tulafono o faigapalota e faamalosia ai tagata ua aulia le 21 tusaga o le soifua ma i latou ua suafa matai ona lesitala, ae o le aiā tatau ma le faitalia a le tagata lava ia e alu ai e fai lana palota.

O le taunuuga la e lei aloaia ua tulai manino mai ai le filifilia o le susuga Seiuli Ueligitone Seiuli, e avea ma faipule o Sagaga Le Usoga mo nai masina o loo totoe o le paeaiga faapalemene o loo iai nei, lea ua faamoemoe o le masina o Tesema 2015 o le a faata‘ape ai mo le isi palota tele i le tausaga fou 2016.

Le susuga Francis o se tasi o Ofisa sili lagolago o le ofisa o le Komesina o faigapalota na ia faailoa le agai atu o ni tagata e fia palota i le faigapalota laitiiti a Sagaga Le Usoga, ae na maua i sailiga e leai ni o latou suafa i le lisi o tagata palota o lea itumalo